Selamat Tahun Baru

Lama nadai rembus ngagai menua diri empu laban ti kelalu mayuh pengawa ujung taun tu. Bisi semalam nya, pukul 6 pagi kami sebilik tinduk laban ke bisi pengerami ba rumah panjai kami. Baru ka lelap mata dani ga baru laban kaban aku dah telefon ngasoh ngabang ke rumah anang enda-enda. Lemai nya nemu rita kena aya aku nadai... nyau ga aku nganjung indai aku kin... Cancel magang-magang program aku malam nya. Pagi siti tumu ga aku ke Betong laban kaban lama maia sekula suba nikah. Ka nurun malam aja, nadai orang ngambi gambar aku legi, ko ia telefon seminggu-minggu nya.

Pulai ari Betong aku sengaja nutup handphone ngambi ulih belelak mimit... sepi aku dani pagi nya isi nyau angat... rekung ga pedis. Engka laban udah dibai makai rian sebedau nya. Ka sari tu aja meh aku bisi lantang mimit asai... Bisi ini aku enggau aku ditu, enda ga aku sunyi amai.

Pagila udah taun baru... Nama azam kita? Aku nadai mayuh azam semina ka ngemansang ke diri empu... Aku rindu ke pengidup ti simple.

Udah berapa taun tu udah aku bisi berunding ke ulah kitai mensia. Aku kala ditanya.. nemu nuan sanu bla bla bla? Kemaia bla bla bla? Bisi bla bla bla? Aku antara orang ti paling mimit nemu hal tepi kain orang bukai laban aku sigi enda peduli iga ke personal life orang. Ba nama ia personal life... Kira ke privacy meh. Ari suba aku sigi jarang ka nemu hal orang tang maia diatu environment nyau berubah. Enggai aku nemu bisi ga orang ka madah.

Bisi kaban aku empu, paling bahaya meh ia tu dipeda aku. Ia sigi manah enggau orang... selalu menasihati orang ti bermasalah tang masalah orang nya sigi enda selamat ba jari ia. Aku tu selalu amat dipadah ka ia rahsia orang ti selalu berandau enggau ia. Kadang-kadang nyau takut aku nyimpan kelalu mayuh rahsia orang. Nyamai agi nyimpan rahsia kediri. Aku selalu nanya.. nama nuan ka madah ngagai aku enti nya rahsia? Saut ia... nuan anang madah orang bukai au? Enggau aku rahsia sigi selamat tang bakani enti ia madah ngagai orang bukai pen bakanya neh?

Lengka ke kaban aku nya... Cerita bukai

Dalam pengidup, aku bebasa ke pengidup orang bukai. Aku pia mega ngarap ke orang bebasa ke pengidup aku. Aku selalu meda orang ti enda bebasa ke pengidup pangan diri, ngacau pengidup orang bukai ngejung ke orang nya nyau dituntung penusah. Ari ke ngacau idup orang bukai manah agi kitai ngemansang ke diri empu... Aku ninting taun sigi berazam bakanya... siti ayat ti meransang aku... belanda nuju adan

Pemutus PMR

Kemari madi aku nanya kemaia aku ka meda pemutus PMR petunggal aku. Laban ti kelalu lelak aku ngasoh ia telefon aja ngagai apai ia empu @ aya aku. Lembau amat aku ka nurun ke sekula petunggal aku nya. 4A, 3B, 1C. Manah meh nya ko aku... enggai ga ka madah enda manah laban tudah sigi kurang mimit. Enti madi aku bulih pemutus bakanya sigi tusah ati apai indai aku ga...

Bala bukai bisi ga 7A, 1B... 7A,1C... 6A 2B... Nama B ko kita? Bahasa Inggeris... Nya ko ati aku din... ari suba aku ngasoh kita belajar Bahasa Inggeris mayuh amat ga alasan bala sida...

Tadi ibu aku nanya bakani ke aliran ti manah diambi petunggal aku pom 4. Aku enda tentu ngasoh ia ngambi aliran sains laban Math Science enggau English ia nadai A siti. Tang ia empu ka ga nguji... nya aku madah... enti nguji anang alang-alang. Tucum aja ga tudah tuai... Aku bisi pengirau ati tang aku meda ia yakin amat enggau diri empu. Nadai ga cara bukai enti tudah tuai ka nguji... asal ka usaha...aku sigi nyukung. Enti buruk belajar sigi nadai jalai ka bulih pemutus peresa ti manah.

Udah 10 taun baru beserara

Dua ari ti udah bisi kaban aku nganjung email ngagai aku. Ia madah ia enggau kaban siku agi ke Kuching ujung minggu tu. Ia bisi madah ka ngetu ba Sarikei suba tang aku pen ke Kuching minggu tu ila. Nya alai aku mai ia betemu ba Kuching aja enti bisi ari. Aku nanya kemaia ia pulai baru laban ujung minggu nadai ari aku ka betemu enggau seduai. Nya ia madah engka pulai ari dua. Bisi ga ati aku ka numpang seduai pulai tang ninga siku nya engka enda nyadi ga enggau laban agi bisi badminton match. Ia bisi ga mai sertai tang aku irau laban ia tu bisi pangan... enda nyamai ga ati.

Aku nganjung sms ngagai ia udah nya madah ke diri enda ulih enggau sida bejalai ke Kuching. Pulai engka ulih aku enggau ko aku... nya pen enti bisi orang bukai enggau. Laban kami duai sigi rapat, aku terus terang enggau ia madah nama kebuah aku enggai enggau ia pulai enti kami duai kediri. Dia ia madah seduai pangan ia udah beserara. Tekenyit aku ninga laban seduai udah kelalu lama bepangan... lebih 10 taun enti aku enda salah. Mayuh udah pemedis, pemerinsa, pengaga disepi seduai ngelama-lama tu.

Aku enda ga sampai ati ka nanya lebih-lebih taja pen ati aku din sengit-sengit ka nemu nama kebuah seduai beserara, sapa dulu mai beserara?

10 taun... puas aku berunding... Munyi ko lagu... anang bepangan kelalu lama... Aku sigi enda teleba pangan lama ia nya. Nya aku mina meri jaku peransang ngagai ia aja. Tambah mega ia ka berengkah kerja taun baru ila... nya aku madah... ila bisi nuan tetemu ke indu ti patut enggau nuan.

Buk

Aku ukai orang ti selalu ka nyimpan buk lama-lama. Enda datai 3 bulan sigi digunting aku... macam-macam stlye ka digaga tang pedis ga enti udah kerja tu. Enda tau kelalu iga ngaga buk...

Kadang-kadang enti buruk ka ngadu ke buk, tancang setengah aja... pama meh ulih ngelindung rekung ngambi ka enda celum iga kena panas. Enti kerja buk mesti ditancang...

Ujung taun tu aku ngempat buk aku pandak baru... lelak amat nyaga buk panjai... diatu aku belajar baru, nadai ari ka nyugu buk lama baka suba... ka jimat shampoo meh...

Buk dikempat pandak... mayuh orang madah aku nyau baka nembiak pom 5. Manah meh nya...

Bungai Mata Panas

Siti agi bungai ditanam aku ba rumah... Sunflower/Bunga Matahari/Bungai Matapanas... Bungai tu nyamai agi ditanam tang enda tan lama... Udah bebungai, ia lalu mati. Bungai tu ditanam ngena leka... kuaci ke selalu diempa kitai digaga ari bungai tu meh enti bisi bala enda nemu.


Bedau ngerembai....


Bungai tu enda ngerembai serentak... ia selalu ngerembai ari baruh dulu...


Udah bisi indu utai nutu...


Ngerembai penuh...

Bungai

Aku sigi rindu betanam ke bungai. Enda nemu nama kebuah... ta lain hobi aku diatu. Engka laban umur nyau majak biak kini. Suba mina nganjung orang aja aku meli pasu bungai, meli paung bungai.

Tu siti bungai ke ditanam aku enggau indai ba rumah... Aku agi nganti bungai matahari aku bebungai.

Buah Mawang

Udah aku tembu ngaga assignment tadi aku lalu online. Meda-meda blog lalu meri komen ba blog orang bukai. Oh ya... madi aku pulai kemari... rami kami sebilik makai lemai taja pen ka lima iku aja...

Benung aku ngiga gambar ti ka dipansut ke aku ba blog aku tu, datai bini tuai rumah nganjung ka aku buah mawang. Kemari maia ia ngambi paku ikan ba belakang rumah, aku bisi mesan ngasoh ia nganjung ke aku buah mawang... Ia ngasoh aku ngambi ke Tamu terus laban ia bejual din sari tu. Ngalih ari tadi ia telefon ke rumah meda aku lalu bedau datai. Nya aku ngasoh ia nganjung terus agai rumah...

Aku selalu meli ari ia... kasih ke tudah tuai tang enti aku meli seringgit sigi diberi ia mayuh amat buah baka rega RM3. Kemari aku udah madah, meri aku nyampau ke rega seringgit aja... Sigi dianjung ia ke aku rega seringgit tang enggai dibayar... Nya aku enda rindu amai, ko aku ngagai ia tadi. Nadai ngawa nya deh.. ukai selalu aku meri nuan buah mawang, pia ga saut tudah tuai.

Nyamai amat buah tu enti digaga ke sambal belacan... mawang mata tu.... bedau mansau.. akai dai..

Lelak amat

Baru datai ari Kuching aku. Lelak amat laban berengkah ari Hari lima aku mupuk ke Kuching, lemai nya lalu bejalai enggau bala bakih, nguntin buk, lelak buk panjai. Malam nya Simba seduai Pudun datai ke rumah aku ba Matang... bisi berandau mimit ko Simba. Udah tembu berandau kami empat Ulau ngagai Siang-siang Matang, makai malam. Benung makai dia Ezra, kaban kami ti bansa Penan sms aku... madah ke diri merajuk laban aku datai ke Kuching nadai ngabas ia.

Udah makai kami empat lalu ngabas sida Ezra serumah (Diana, Doreen, Alice, Danny, Carol) ba Kpg Tunku. Kira-kira sejam dia, kami pulai ke rumah diri empu.

Pagi hari enam aku lalu nurun ke kelas... Tengah hari aku ke King Centre..ko jaku ka betemu enggau Dr. Chen sebedau ia pulai ke Penang. Enda ga ulih betemu laban pukul 2 aku nyau bisi kelas baru.

Pandak ke cerita, kelas aku abis pukul 10:30 malam lalu ngambi bala sida Ulau, Diana, Doreen enggau Alice ba KEC laban sida enggau sambutan Pra Natal. Pukul 12 baru datai ba rumah.

Pagi hari minggu aku nurun kelas baru tang tumu kami abis sari tu. Aku lalu ngambi Simba ba BDC, berandau enda lama enggau apa - mak ia sebedau naban ke ia pulai ke Matang. Bala ka piknik tang meda ari nyau ka ujan... enda ga nyadi. Malam nya bala sida Ezra mai dinner ba Tokyo Seafood tang kami tiga, aku, Simba enggau Ulau nurun ke SIB Satria Jaya, enggau bala nyambut Pra Natal... Udah abis refreshment ba gereja... kami empat, Pastor Ambrose supper ba Tabuan...

Pagi tadi Ulau tumu-tumu udah tekurung ba bilik laban pintu jai... Laun tudah tuai kerja sari tu. Udah nganjung ia kerja baru sida aunty nganjung aku ke terminal bas... 6 jam baru datai ba Sarikei...

Patut enda?

Aku selalu enggau bala besaut ba rumahdayak topik patut enda nyebut nama entua? Ukai nama aku berminat laban aku meda kadang-kadang bala kitai kelalu ka ngelaung ari nyebut nama entua sampai orang enda nemu utai disebut. Sebedau aku bejurai ke penemu aku, dulu aku minta ampun laban aku nemu utai tu kelalu sensitif ba bala kitai...

Ukai aku madah kitai tau nyebut nama entua.... Aku tu bedau bisi entua tang enti bisi jemah ari ila ngarap ke entua aku open minded. Anang ngumbai aku tulah enti tesebut ka nama. Baka ni kitai ka bejaku enti nama entua ta selalu amat ka disebut baka nama Dan? Enti orang ti gawa ba endur bukai engka ulih ga ngelaung ngena jaku ribai... baka ni bala pengajar lebih-lebih agi guru BM tauka sastera? Enti nya pen dikira tulah.... nyamai ngiga entua ti ukai nama bakanya. Hehehe....

Nama reti enti ngelaung ari nyebut nama entua tang enti bejaku sigi ngena jaku jai belama-lama eg. "dadak amat nuan tu" ? Nama reti adat basa enti semina enda nyebut nama entua tang bejaku ngena jaku jai beari-ari enggau entua?

Baka ni kitai bebasa ke entua? Ukai sema entua aja tang orang bukai ti begulai enggau kitai. Aku selalu ninga bala kitai enti bejaku ta selalu amat nyebut jaku ti enda manah... Uji pulai ke rumah panjai... bala indai selalu amat nganu anak sida ia palui, dadak, beli.... ni enda anak sida nyau nyadi bakanya... indai diri empu nyebut. Laki bini bejaku jai... dini adat basa?

Anang nganu okay..tu semina pendapat aku aja... Pendapat ari orang ti bedau bisi entua... hehehe....

Em....

Biar nyawa ba ujung senapang
Biar lesi ba mata pedang
Biar mata dilamun sebun
Sanggup nenggam bara api sampai nyadi arang

Baka Ni Tu?

Ukai ka bejai, ukai ka nganu tang tu meh realiti dalam pengidup kitai... Semina digiga maia bisi penusah aja, enti bisi utai ka ditunduk ka.

Nadai peduli amai enti orang enda bejai ba belakang... kitai idup ukai kediri. Besukung, besaup meh enggau pangan diri ngambi pengawa berat tau nyadi lempung.

Tang udah ngasai ke pemedis digaga baka tu... maia bepansa nadai ka nanya, maia bejalai nadai ka mai, maia jauh nadai ka nganjung berita tang maia bisi penusah sigi digiga. Enti enggai nulung lalu dipejai ba mua orang bukai...

Bala Majak Mayuh

Diatu ati makin teperindang ulih maca mayuh blog ti ngena jaku Iban baka sida Cathess, Puteri enggau Aki Gerubi. Aku cukup teperansang meda sida ti udah diau ba menua ribai din enda ninggal ke jaku asal diri empu. Bah... ni agi bala kitai ti bukai? Lapa enda berengkah ari sari tu ngaga blog ngena jaku diri? Ngarap ke madi aku ulih ngaga maia ia pulai kemisi tu ila.

Suba & Diatu

Hehehe.. enda lama aja aku ka mantai ke gambar2 lama suba ba ditu. Sorry!!!!!

Indai aku nyua ke aku gambar2 lama aku suba... Nama agi... ketawa aku meda gambarnya. Rindu amai aku meda.... maia agi mit suba, sigi rindu begambar...

(nadai gambar)
Gambar maia primary 6. Begambar kena masuk Form 1. Besai amai cermin mata nya... enggai ke enda ulih meda utai ditulis cikgu ba papan tulis

(nadai gambar)
Gambar kad pelajar maia Form 4.

(nadai gambar)
Gambar maia udah kerja. Serius mimit...

(nadai gambar)
Gambar kemari.

Bakani gambar maia udah tuai ila kini?

Bejalai enda lama

Enggai enda madah ke kita... aku engka nadai ngabas blog aku tu dalam kandang seminggu tu ila laban aku bisi bejalai ke bukai. Enti aku bisi ari, ila aku update ari nyin. Enti nadai ari... minggu baru bisi aku pulai.

Arap kita semua mujur dalam semua pengawa lalu tau ga nyukung aku dalam sampi. TQ....

Jaku Peransang

Minggu nyin kemari indai aku bisi nusun bup-bup lama aku ba stor. Dia ia tetemu ka bup autograf aku maia aku pom satu suba... maia nya aku belajar ba SM Sains, Miri. Lama aku udah ngiga bup aku tu laban enti suba aku sigi rindu maca jaku perangsang ari bala sida ke Pom 6 ti ditulis ba bup aku tu...

Tu sekeda ari ke ditulis ba autograf aku. Aku enda enda nemu bagi sida ti nulis laban sida semina ngaga signature aja...

Grace, ingat ulih nuan pesan aku. Belajar bebendar maia peluang bisi. Nesal diatu bisi guna tang nesal dudi nadai reti. Ngajih ke nuan mujur sekula lalu datai ngagai sekula ti tinggi. Awak ke maia dudi ari bisi ngiring bansa Iban rebak baru enggai ke jauh tinggal pemansang laban orang. At your age, study should come first. Meanwhile relationship have time to cultivate (bedau maia ia) -DSP Upper Six Form 93, Jalan Gambir, Sibu

Hai Grace... Ingat ke pesan aku di baroh tu :
1. Belajar bebendar
2. Selalu ingat ke Petara
3. Anang gila orang laki - empai maya ia.
Penudi endar, arap ka nuan mujur dalam PMR 1995 ila - MJ, Kapit

Sis Grace!Brother arap ka nuan belajar meh enggau bebendar awak ka enda nesal dudi ari. Pea mega aku arap ka nuan mujur dalam semua pengawa. Jadikan setiap kesilapan sebagai pengajaran seperta kata bidalan Inggeris ini : "An intelligant person learns more about rebuke than a fool learns from being beaten a hundred times". Alway pray to God serta ingat meh ka pesan apai indai nuan. Peda Hebrews 12 : 7-8 - X-KP, Sematan, Lundu

My Dear Sister Grace, nadai orang ulih ngubah pengidup kitai enti enda diri empu lalu anang enda ingat idup kitai semina setaun dua aja tang lebih ari nya. Pemedis pemerinsa enggau pengelelak ti di asai ka ba sekula enda lama enti dibanding ka enggau pengidup dudi ari. Tu siti ari 'invesment' untuk masa depan. Ransing ka ati lebuh maia belajar anang guai ngerunding utai bukai laban kitai udah jauh amai ditinggal ka orang. Selalu bepanggai ba Tuhan dalam semua hal lalu Tuhan deka nunjuk jalai ti lurus ngagai kitai - Rh. Numpang, Batang Ai.

Enti sema kita ngelala tauka kita empu orang ke nulis tu ke aku suba... aku meri terima kasih ke jaku peransang ti diberi kita ngagai aku suba. Aku agi ingat... maia aku agi pom 1 suba... sigi agi mit amat maia nya diau ba menua orang. Enti maia kemisi, aku enda pulai, aku selalu begulai enggau bala sida pom 6 kelebih agi Kak Ipah enggau Kak Jen. Sida selalu mai aku belajar ba kelas sida... nya aku ngelala mayuh agi kawan-kawan seduai ia.

Setaun aja aku begulai enggau sida. Udah STPM sida nadai agi ba sekula. Maia aku ba uni... 6-7 taun udah nya bisi ga aku betemu enggau sida... Apu... nyau dara nuan Grace

Diatu aku enda nemu dini endur sida... Arap ulih betemu enggau sida baru... bro and sis, thanks.

Buah #3

Buah ucung agi mata....


Buah ucung udah mansau...

Buah...#2

Agi ingat sari nya aku aku bisi madah pasal bungai buah? Udah aku ngabas kebun ba belakang rumah, enda ingat ke bungai rian lama udah rarah.. nyau udah belanggu rian diatu.

Semina tu aja meh gambar ke bisi diambi aku lemai kemari. Laban nyau udah serpan, pulai kami duai Blackie, takut tesat...hehehe...


Bungai nyekak @ pakan... bau ngelu...


Tu dikumbai kami semenua buah uchung... Enti udah mansau mirah buah ia...


Buah langsat...


Blackie...


Daun bungkang... dikena kitai manduk lauk-lauk dagin.

Ngambi Indu

Pagi tu benung aku ngemas rumah, dia aku tepeda ke gambar-gambar lama maia orang ngambi aku indu mudik ai Julau... Enda aku nemu endur tu laban bala sida tu enda mai aku, agi ba sekula aku maia nya enti enda salah aku.


Baru ka bekejang... ba ili, ai keruh...


Ngetu ba rantau jalai... merarau...


Udah datai ba endur ti dituju... bala ditiki enggau adat Iban... pelaba aku meh.. aku enda enggau maia nya.. hehehe...

Pekit Karoke

Nya ya... lemai kemari bisi bala sida tuai rumah datai ngagai kami sebilik, berandau ke ka ngaga pekit karoke ujung taun tu ila.... Aku laban ke ka nurun ke pasar mina ninga mimit aja. Pulai ari pasar baru aku nanya indai aku.

Asai ka ga ati tu enggau orang ngeruh ai... Aku tu sigi enda kala enggau orang pekit karoke... Kala ga suba, maia agi sekula... wakil rumah sukan... bulih lumur 3. Maia ba matrik wakil kelas bulih lumur 2... Hehehehe.... Malu amai tang laban nadai orang bukai... enti enda nganjung wakil kena ukum ko sida penganjur.

Nama lagu ka dibai aku neh? Uji kita meri buah runding kita ngagai aku.... hehehe... Luput bala bakih ninga aku enggau orang pekit karoke tu ila...

Buah...

Udah bebungai rian kita ba menua? Enggi kami ditu bisi ga.. tau datai ngabas enti udah labuh ila.. Selalu enda alah empa buah rian... jual ba Tamu Nyelong, pama meh bulih seringgit dua. Kami duai Fred selalu enggau orang bejual ke buah ba tisi jalai agi mit suba. Nganti orang ke mansa meli buah rian. Seari-ari meh... laban pun rian tisi jalai, nyamai kami duai nyaga. Enti ninga munyi buah labuh, siku mulung, siku nyaga 'kedai'. Kadang-kadang ujung minggu baru kami duai bemalam ba langkau, nguan rian ke jauh agi ari jalai. Rindu ga pengawa bakanya... Patut datai ke besai kami duai Fred ka endar camping.

Udah besai tu... enti bisi ari, maia kemisi, bisi ga kami duai enggau orang bejual ba Tamu. Tau enti kita ka ngiga kami duai ujung taun tu... Anang enda meli buah rian kami duai ila au...

Legi aku bejalai ke belakang rumah.. ngiga bungai rian. Lemai tu kini aku mansut ke gambar bungai rian.

Pasar Minggu Sarikei

Lemai kemari sida indai, apai enggau madi aku nurun ke pasar. Taja pen lemai ari enam tang udah mayuh orang datai ba pasar minggu. Sida tu datai ari menua ti jauh baka sida ari Pakan, Kabung, Julau sereta mayuh agi... bebai ke utai pemisi diri dijual sida ia pagi ari minggu. Nama kebuah sida tu datai tumu? Nama enda datai tumu pagai ari minggu...
1. Nadai moto dikena tumu pagi ari minggu.
2. Nadai nalan endur sida ia bejual enti laun datai.

Dini endur sida tu bemalam ari enam? Sida mayuh tinduk ba langkau bansal endur sida bejual... nadai dinding, semina atap... belapik ka guni... kotak... suratkhabar... plastik.

Sapa bala sida tu?
Ia ke mayuh endar, bala indai tuai orang, umur 50 taun ke atas...

Nama utai selalu dibai sida?
1. Daun sabung/empasa
2. Ensabi
3. Upa lalis/pantu/jelayan/nibung/apung/mulung/nyur
4. Lempis ikan
5. Lulun ikan
6. Asi pulut dalam ruas
5. Kasam
6. Tekuyung minyak/panjai/kerikap
7. Timpa/raga/jagan/tubang/uyut/senduk/duku/lungga
8. Daun lung/ruas/daun pisang
8. Pupu utai ti tau diempa... aku pen enda ngelala....

Enti kita ka meli, tau meh datai ngagai pasar minggu Sarikei...


Lempis ikan bangah enggau entabalang. Dilempis enggau daun lung... rega ia RM1 aja... asai ia... nyamai amat enti diempa enggau asi angat tauka asi pulut dalam ruas. Lempis tu dibai indai tuai siku ari Lemujan, Pakan.


Ni bangah? Ni entabalang? Entabalang bisi petik celum... Bangah nadai... Bejimat ke makai, enggai ke engkelan.


Nama buah tu? Tu meh dikumbai orang buah ridan. Dan (batang) ridan tau digaga ke baur ginti... kena nginti ikan... udahnya lempis kitai... Dan ridan tau mega dikena ngaga raga/timpa/kerungan manuk... mayuh agi utai bukai. Rega buah tu RM1


Buah asam kumbang... anang nitik ai liur au... RM2 aja..

Nama anti agi... aram meh kitai nurun ke pasar minggu Sarikei.

Apai Nyamun...

Aku maca blog menyadi aku Fred tadi. Ia bisi ngenang utai ti kala digaga maia agi mit... lalu ia bisi besebut ka apai nyamun...

Kala kita ninga apai nyamun? Sapa apai nyamun nya? Maia agi mit suba, dua iti aja utai ti ditakut aku... Antu enggau apai nyamun. Ari mit aku sigi ka amat bejalai dalam babas. Datai ke diatu 'hobi' nya enda ulih dilengka. Nya alai, maia ba universiti suba aku ngambi Biologi Sumber... ngambi ke selalu agi bejalai, tinduk dalam babas... nangkap semawa, tupai, indu utai (udah nya lepas baru)...

Pulai ngagai cerita asal, maia agi mit suba, sida aki aku selalu madah, "anang bejalai... bisi muam/antu/apai nyamun nangkap nuan legi" Sigi enda nyadi meh aku ka bejalai...

Diatu, nyau udah besai... antu nya enda aku takut tang apai nyamun sigi ulih ngasuh ati enda nyamai sema bejalai kediri.

Endai... sapa apai nyamun nya? Ko penemu aku maia agi mit suba, apai nyamun nya orang jai ti nangkap anak mit, jual ngagai orang jai bukai. Tang diatu... ukai anak mit ajak ditangkap apai nyamun pelaba aku... orang besai ka meh sida ia nangkap... Nya alai aku agi takut ka apai nyamun. Kita deh?

Nugal...

Laban ke udah enggau orang makai pansuh lauk orang nugal ari lima sari nya, enda nyamai ga enti enda enggau orang nugal. Aku nurun laun mimit pagi ari enam nya laban udah lelak driba ari lima pulai ari Pakan. Tambah agi indai aku mesan ngasoh aku masu gari dulu.

Sida indai tuai bumai bukit enda jauh ari rumah panjai. Nama reti nugal kini? Enti bumai bukit, nugal... enti bumai paya, betambak... reti nya nanam padi meh. Nugal tu ngena leka padi, betambak ngena anak padi ti udah ditanam dulu.


Leka padi dicampur enggau baja ngambi ka jampat agi nyumbuk...


Seluk tu endur orang nyimpan leka padi... Aku laban enda mai seluk, ngenggam aja meh...


Tugal digaga ari kayu... enda tau ngena besi... (enda nemu nama kebuah)


Ibu aku benung menih...


Baka tu meh leka padi ti udah ditanam....


Sida ke laki nugal...


Umai bukit...


Penulis enggau Blackie....


Sapa orang nya?


Laban takut ke diri laun, enggai ke enda ampit enggau orang nugal, moto di'parking' aku sebarang. Lapa deh... nyau lekat....

Manduk Pansuh

Lemai ari lima sari nya aku pulai ke rumah panjai, ngabas ini aku. Udah dua minggu nadai pulai. Minggu keterubah aku ke Kuching, minggu nyin kemari aku enda pulai ari Pakan laban mayuh amat pengawa. Ko jaku enda lama aja laban sida B bisi sekula ari enam. Datai din nemu sida indai tuai bisi nyayat jani, lauk orang nugal. Indai tuai enda ngasoh pulai, betugung makai ko ia.

Enda lama udah aku datai, Indai Ugak (isan indai tuai) pen datai ga. Kami duai Ia lalu ngadu ke jani ti udah dibela...


Peruk dagin enggau garam, MSG (micing) enggau daun bungkang pengumbas asai ia.


Udah nya... tepu dagin tadi ngagai ruas. Anang kelalu penuh enggai ke melumpa legi. Tensang mua ruas ngena daun pisang.


Tunu ruas ba api... peda manah ka enggai ruas kita angus...

Udah mansau, empa meh... Minta ampun, nadai gambar pansuh udah mansau laban maia nya kelalu lapar, nadai ari ka ngambi gambar.

Getah...

Diatu getah berega amat... Aku pen engka ka nangkal kemisi ujung taun tu ila... Ka ngiga extra income kena meli baju baru...


Buah getah tau diempa... Ila aku bercerita baru... nadai ari amat-amat aku diatu. Minta ampun.

Buya Bepangan Aja _ Paul Erika

Bepangan enggau nuan aku nesal diri
Begulai tua mina masau ari
Nuan bujang dara ti aku anti
Nemu nya nuan udah dulu bebini belaki

Janji semaya tua dulu suba
Deka niki ngena lif niri ke rumah tangga
Tang diatu mina nyadi mimpi
Nya meh ngasuh ati aku beraie…

Chrs :
Sampai ke belaya tua bepangan
Nuan udah ninggal ke aku
Nuan ngasoh ati aku lebu
Semina buya bepangan aja

Nadai meh reti aku ngenang nuan agi
Aku Nuan udah bisi orang ke ganti
Lebu amai aku meri pengerindu
Nemu nya nuan malas aku enggau pemenci

Enti Ubek maca tu mesti ia ketawa ke aku... Kemaia nuan nemu belagu Iban Mang? Pesan nuju Ubek... belajar bebendar dik au... Pulai ke Serikai ila kitai makai mee kampua.

Mayuh amat pengawa ujung minggu tu. Nadai ari ka mindah. Bisi kaban mai ngagai rami makai malam. Enda nemu ia serius ka enda tang sigi nadai ari aku ka nurun. Bisi ga kaban mai raun-raun bejalai...

Taun baru sigi nadai ari aku bejalai ujung minggu agi... Ila meh madah ngagai kita nama kabuah. Ngagai bala ti agi belajar, ba sekula, ba universiti, ba pusat latihan... anang masau ari kita. Belajar bebendar ngambi ka bisi ngemansang ke diri empu.

Betemu Baru

Baru pulai ari pasar Serikai aku tadi... service moto aku.... sari nya pancit tayar, tadi enggai idup injin... nemu endar ia orang baru terima...

Nama berita kita wai? Nyau mayuh bala bisi ninggal ke pesan ba messagebox peda aku... Suba mimit endar...

Ari minggu tu tadi maia aku pulai ari Kuching, ngetu ba simpang Sri Aman, merarau. Peda aku siti kedai, nadai orang. Ba sepiak-sepiak mayuh orang peda aku. Terus aku mai kaban aku duduk dia... tambah mega aku sigi enggai enggau orang besekut ba endur bukai... nyamai agi ba endur ke nadai orang. Nyamai ga lauk dia... bisi manuk pansuh, ikan jelawat pansuh, ikan patin pansuh, daun empasa rebus... masuk amat makai tengah ari nya. Rega umbas ia ga... layanan (nginjau jaku Melayu) manah, tucum belama ibu nya meda kami duai kaban aku. Tekenyit ga ia ninga kami duai bejaku Iban ngena slang Pakan... engka meda siku baka gamal indu Cina, siku agi baka gamal Orang Ulu... tang bejaku Iban. Ni enda... indai ke siku bansa Cina, indai ke siku agi bansa Murud.

Nadai mayuh cerita ke sekali tu... lelak amat udah bejalai tadi. Enti bisi ari, ila becerita baru. Mupuk aku...

Menantu Kaya Peturun Raja _ James Jacob Selat

Cukup udah pemalu
Disepi aku oh sulu
Sampai kala ku diludah enggau diburu

Lebuh ku datai nemuai
Ngagai rumah nuan oh ambai
Apai indai nuan keras tetap madah enggai

Puas udah aku nguji
Nguji ka ngambi ati
Tiap kali ku datai ditambit pintu

Nuan tu nadai guna
Pia ko jaku sida
Semina ngundang penusah ke kami aja

chorus
Bakeni cara tua ulih begulai
Ti majak baka tu
Nyau pandak meh jalai
Ti nitih ke peneka ba ati sida
Nyendia duit bejuta
Genap reta tengkira

Cukup berat peminta
Apai indai nuan bujang dara
Ngiga menantu kaya peturun orang pangkat besai raja

Keterubah aku ninga lagu tu suba ari bala nembiak ti ka bendar betempap mija enti belagu. Sida rauh-rauh belagu, aku rauh-rauh ga ngasoh sida badu. Nyau pemuas ti ninga lekat ga chorus lagu tu ba aku. Mayuh bala kaban tekenyit meda aku nyau nemu ninga lagu Iban. Nemu ninga lama udah wai... ari mit tang nemu belagu baru 2-3 taun tu meh. Mayuh agi orang enggau betemu, mayuh agi ga utai ditemu... baka ke ditulis aku ba atas nyin, enti ka idup mesti ka belajar.

Lagu Menantu Kaya Peturun Raja tu lagu orang ti tusah ati laban apai indai pangan ia enggai nerima ia nyadi ke menantu tang rentak muzik ti dikena cukup rancak, ulih dikena bejoget. Manah ga nya... enti kitai tusah ati, anang ga kelalu ninga lagu-lagu frust. Ngasoh tusah ati agi legi.

Kelalu ga apai indai pangan ia nya, betambit pintu, ngeludah... agi bisi bala kitai baka tu diatu kini? Enda setuju ga aku... enti bangat enggai, bejaku manah ga neh... anang enda bebasa ke orang, enda pia?

Ngiga menantu ti meruan sigi betul... tang bejimat ke aya ibu... kelalu ka ngiga menantu kaya peturun raja, anak merinsa legi. Bisi peturun raja kitai? Nadai sepi aku wai... salah lirik nya pelaba aku. Patut tukar ngagai peturun orang pangkat besai, peturun temenggung, peturun pengulu...hehehe...

Teruska Siti Ari

Tengah ari tadi lebuh aku ka pulai dia aku tepeda ke siti kertas atas mija aku... bisi sajak ditulis ba kertas nya. Sajak ari merdeka ti bulih lumur satu sari nya, ingat kita? Ngelai ti meri sajak tu ngagai aku laban aku bisi minta sarinya. Pagila badu sida ia gawa enggau kami ditu... sinu ga ka meda sida sebuat 9 iku mupuk pagila... Arap kita semua bulih pengawa ti mujur udah tu ila... Pajak ke singkang anang malik ke belakang.

Dani meh
Dani meh
Dani meh anak merdeka
Angkat ari pejam mata nuan
Angkat ari ngigau malam
Angkat semua

Terus ka siti ari
Terus ka siti tuju
Singkang ke kaki nua
Terus...lurus...

Terus ka siti ari
31 hari bulan 8
Kena taun 1957
Anang meri hari nya
Ngagai jari orang
Taja pen
Nyawa ba ujung senapang

Taban ka siti ari siang
Enggai ka di telan malam
Enggai ka tinggal sesingkang

Pagila, lusa, ila...
Teruska hari kemerdekaan
Padah ke diri serumah
Bekangau ke diri selangkau
Bekumbai ke diri seberai
Besada ke diri semenua
Menua tu.... hari tu... dunya tu...
Ungkup kitai
Kitai semua...anak merdeka
Merdeka...merdeka...merdeka...

Dibaca : Elviester David Gaong
Digaga : Ngelai Udin

Siti agi sajak bisi dipansut ke aku ba Iban Bloggers.

Cerita minggu tu

Nama berita kita wai? Ni Uncle John tu... enda ngadu ke GIS di? Peda-peda dia meh dini endur hot spot (betul istilah kena aku tu?). Ba Sarawak mayuh diatu pelaba aku laban orang benung nunu. Enda kena ukum nunu umai ditu uncle? Open burning nya... hehehe...

Nadai ga mayuh cerita sari tu tang enggai enda becerita ga enggai ke bala ta lebu ngapa ngabas blog aku tu.

Minggu nyin kemari bala kami sebilik bisi betuggung makai ba rumah panjai. Lauk nadai mayuh tang laban lama enda makai begulai, mayuh asi dijengkau bala peda aku. Aku laban ke selalu makai ba kedai enti maia ari gawa, sekali udah tetemu ke lauk lulun, kenyang amat aku malam nya. Anang ga kita nuju ke lagu Merinsa Belaki Nguai ngagai aku taja aku selalu makai ba kedai... nemu ga aku nyumai lauk... Tau kita nanya Uncle John enti enda pecaya. Sapa selalu nyumai maia kitai ba KK suba uncle?

Ngumbai aku enda nemu nyumai, laban teleba meli asi ba kedai.... nadai jaku nya.


Enti enda kala meda tinduh, tu meh ia...

Pagi ari siti aku enggau madi aku pulai... Bala sida ibu aku ba sepiak tumu pagi udah dani nangkal. Ka aku enggau sida nangkal... enda nemu nangkal, muat ai getah pama meh... Ila meh, maia pemisi panjai. Bisi ga side income kena meli baju baru...

Baka tu getah kami menua Ulu Serikai... peda kita ga getah orang menua Layar ba baruh tu...

Nadai ngacau neh... ila datai ba kilang digaga orang baru meh.... Anang nganu orang Layar au...

Minggu tu tadi bisi ga kaban aku siku meri aku ruti cuan..... selalu aku makai cuan tu maia gawai aja. Lama enda makai nyau tetenguk aku. Bisi resipi kita wai? Orang tunga ke Kakup, Jalai Entabai kin nemu amat ngaga cuan. Sekali aku udah nemuai kin suba, nyau ka setengah tin diabis ke bala kami... Bai pulai pen bisi...

Setengah udah dempa...

Naka tu aja ari aku ke sekali tu au. Anang enda ngabas belama neh... mupuk aku.

Melah Pinang

Nama gaga kita ujung minggu tu tadi? Bisi nemuai ngagai bala apai-indai, aki-ini kita ba rumah? Anang enda enti bisi ari au.

Ujung minggu tu tadi kami sebilik ke Begumbang, Ulu Layar, ngambi indu ke petunggal aku. Nyadi pengawa kami enda ta tentu rami amat laban bala agi bedau nyamai ati udah ke ditinggal ke niang. Asai ke bisi tudah tuai enggau kami tang maia pansut ari moto nadai ga meda ia. Lain asai ati laban ia sigi jarang enda enggaul enti bisi pengawa baka tu laban ia ti nyadi tuai kami sebilik.


Udah datai... sejam setengah ari Serikai


Datai din kami lalu ditiki tang nadai bepalu ke tawak... semina betabi jari enggau sida tu serumah. Udah nya kami dibai ngagai bilik sida ke empu pengawa. Ngirup kupi...


Udah ngirup ba bilik, kami dibai pansut ke ruai. Ngirup baru... bisi siti sungkui tepung ubi (anak panah)... liat baka selipar tang nyamai asai ia.


Udah makai lemai, bala tuai-tuai berandau ke adat. Aku bisi ninga tang enda nemu kati ka nusui ditu. Enggai ke salah... danu tuai rumah aku legi. Udah abis pengawa berandau, nya baru pengantin dibai bejalai ngelingi ruai... sebarang aja munyi tawak dipalu...lapa enda ngasuh aku neh.


Aki sepiak apai pengantin lelaki ngadu ke adat melah pinang.


Makai salau... aku tinduk maia tu. Madi aku ngambi gambar...


Menyadi pengantin lelaki betanda enggau indu dara rumah nya... engka ka mai kami ngambi indu kia baru kini... (SPM abis ke dulu wai....)


Sebedau pulai sempat ngambi gambar getah orang ti dijembui ba luar... Peda kita pemanjai getah nya... begau bala meda getah tu kemari maia baru datai. Eenggi kami semenua paling panjai pen 2 meter kini...

Pulai ke rumah aku driba moto indai tuai laban apai tuai udah kelalu buntau... Semalam-malam bala betanda enggau lagu Kerimpak Kaca Lauya, Menantu Kaya Peturun Raja. Enda nemu berapa kali lagu nya dipasang. Taja pen bedau tentu ka rami endar tang laban enggai enda bebasa ke sida serumah, angkat ga tudah aku enti ditarit orang betanda. Pajak ke dia meh... gasak aja ngari ke ibu aku (indai pengantin lelaki). Ukai kala aku tu enggau orang betanda baka nya. Nya kebuah aku ka takut-takut ke rumah panjai orang enti maia bisi rami kelimpah ari rumah bala kami dirik sebilik. Ke satu, takut diberi orang ngirup lalu ke dua, takut ditarit orang betanda... Nasib ga malam tadi bala sida petunggal aku ke bukai maiuh nulung aku... sida nyadi 'bodyguard' laban nemu aku sigi enda teleba pengawa ke baka nya.

Aku geli ati meda Bibi ditarit orang betanda... aku irau ke ia malu orang nya laban ia tu sigi ka ganas-ganas mimit. Kala sekali seduai ia Nyun ditarit orang betanda suba... siku malu, siku numbuk... bedarah idung apai tuai nya... lapa deh ko Bibi.... ba anang narit orang. Bah... kita ke bujang, bejimat ke narit indu dara kami ari Ulu Serikai enti bisi rami.... Enggai enda madah dulu.

Nya aja ke sekali tu... mupuk aku.

Buah Jelai/Jelayan

Agi ingat minggu nyin kemari aku bisi madah buah jelai tauka jelayan? Ari minggu sari nya aku bisi ke Tamu Nyelong ba Serikai. Dia aku tetemu ka aya siku nyual buah jelai. Seringgit setumpuk...


Tu meh buah nya... Isi dalam nyin kuning, masam (nitik ai liur)... Enda ingat aku ka ngambi gambar isi dalam ia. Sekali aku ka ngambi peda udah abis diempa bala...

Kebun Lada....

Minggu nyin kemari indai mai aku ngabas kebun lada. Mayuh ga utai udah ditanam ba kebun tu... maia aku ngabas, laban bedau tembu diracun, agi repa... kasih ga meda lada nyau kuning lama enda dibaja.


Tu meh pun lada (Piper Nigrum L.) Bala aya enggau ibu... enti bisi bala anak enda kala meda pun lada...asoh meda blog aku tu. Kasih ga bala kitai... kitai ke nanam lada... udah nya kitai ga meli serbuk lada ba kedai... lapa nda ngaga kediri empu neh...


Buah lada. Enti dijembui terus udah leka diserara ari tangkai... nyadi lada celum (lada hitam)... Enti leka direndam ba ai... kulit luar dibuai... nyadi lada burak(lada putih). Rega lada burak mar agi ari lada celum laban proses ngaga ia lama enggau tusah agi.


Pun lemba (Cucurligo Latifolia ari famili Hypoxidaceae) Buah ia tau di empa, tau dikena ngubat pedis pala enggau ulser mulut.


Kala kita ninga entelah 'asi mansau periuk pecah'? Tu meh saut ia... buah kemunting tauka Melastoma malabathricum. Buah ia celum... tau di empa kitai mensia tang burung ke selalu agi makai. Asai ia kekadang tabar, kekadang manis tang mulut sigi celum udah makai buah tu. Daun ia tau dikena ngubat telih... Maia agi mit suba enti kaki telih bendar bala kami begiga ke daun kemunting tu... dikunyah lalu diengkah ba telih... Enda nemu nama kebuah... nitih ke jaku orang tuai aja...

Ba tisi kebun bisi pun jelai.... Nemu buah jelai kita? Buah jelayan ko sekeda tang aku bedau tetemu ka nama saintifik agi... Tau kita nulung aku lebih-lebih agi bala ke udah belajar taksonomi tumbuh-tumbuhan.