Ngaga IC

Agi ingat aku kala mansut ke blog nembiak siku bulih 8A ba PMR tang nadai surat beranak? Enti surat beranak nadai, IC tentu ga nadai...

Udah aku nemu cerita nembiak nya, aku lalu nanya pengajar siku ti nemu agi kebuah nembiak nya nadai IC. Ia tu mayuh madi, indai ke ngada ke ia udah nadai. Tang aku enda ingat nama kebuah apai ia enda ngaga ke ia surat beranak. Bala madi ia bukai bisi IC magang.

Nyadi ko pengajar siku, ia kala nanya agai Jabatan Pendaftaran ba Sarikei prosedur ngaga surat beranak. Apooo!!! amat rumit sema nadai dokumen. Ari bulan satu suba aku ngambi borang, bulan sepuluh tu tadi baru aku ulih nganjung application form nya ngagai Jabatan Pendaftaran ba Kuching. Tambah agi nembiak nya sigi enda tentu ka kiruh ga. Nyau pengajar ia ti kiruh ke ia... Nya kami duai pengajar nya nyau ka putus asa laban dokumen ke asoh kami bai ia nadai belama-lama.

Diatu kami benung nganti pemendar ari sida JPN. Nyadi ko sida ia, enti nadai penanggul, tiga bulan agi ulih ambi meh dokumen nya ari JPN Sarikei.

Nikah Amee...

Amee tu petunggal sepiak indai aku... terus terang aku madah aku enda nemu nama penuh ia. Laban ia sama pengajar ga, bisi siku pengajar nanya aku "dini alai Cikgu Lau Yeing .... (enda ingat) diatu?" Aku nanya ia baru "ia ke siku ni?" hehehe...

Semua nama sida petunggal aku ke ari sepiak kami semina enda sama ba ujung. Taja ukai diri menyadi tang engka ini aku ngasoh bala aya aku meri nama anak sama magang. Enti indu Lau Yeing... enti laki Lau Ruen..... So kira nama aku tu Lau Yeing Grace la... hehehe.... Nama Fred, Lau Ruen Fredy... keh3x.

Amee tu anak ke empat ari enam iku diri menyadi. Aya aku tukang kayu...ngaga almari, meja (enti ka nempah tau meh). Ibu aku suri rumah aja. Sida semadi semua nyadi pengajar, semina Alung ja ti nyadi engineer, diatu gawa ba 1Borneo. Aku enda tentu rapat iga enggau Amee. Aku rapat agi enggau Afung (nama penuh ia Lau Yeing Hung) laban kami duai selalu dikumbai orang twin..Birthday pen sama semina Afung tuai setaun ari aku. Taja pia, Amee tu bajik ke sida ia semadi peda aku... Lady like agi.

Afung tumu-tumu warning aku anang enda datai makai pengerami nikah Amee laban aku tu sigi selalu bejegau maya kemisi. Tu meh sekeda gambar nikah Amee maya kemisi Raya sari nya. Rindu aku meda pengerami nikah seduai. Simple ja... nadai mayuh protokol. Amee segau-segau ngirit gaun ia bejalai agai mija kawan-kawan. Kehkehkeh... Semina maya meri basa agai bala sida apai indai, aya ibu aja ke kira formal mimit.


Laki ia diperkenalkan agai bala-bala mentua


Hormat... hormat.... hormat...


Peda kita pemesai tucum ipar aku bulih angpow...

Taja Amee enda nemu maca blog aku tu... aku arap ke seduai mujur dalam pengidup seduai ia berumah tangga..

... aku kemaya agi (nemu aku sekeda kita ka nanya bakanya deh...)

Kemisi Hari Raya

Lama nadai update aku empu blog. Semina ngabas aja laban nadai tentu bisi ari endar. Bala pengabang pen nyau jarang datai... Hehehe...

Kemisi kami berengkah ari lima nyin kemari. Ari enam kami sebilik sampal ke Kuching laban ka ngangkut tanah ngagai belakang rumah endur bersayur... Tiga ari kami ngangkut tanah baru tembu. Berasai pedis isi bai tinduk malam..

Pagi tumu kami sebilik dani ngangkut tanah laban enggai ngelaban matapanas... Kira udah pukul 10 kami badu lalu bejalai ke bukai... Lemai ari datai lalu ngangkut tanah baru... Ni enda lelak.







Pagi ari minggu bejalai ke Serikin... Aku meli kain 3 lambar... Kena ngaga baju kurung. Aku sigi rindu ngena baju kurung enti ngajar laban aku tu ganas mimit enti bejalai. Siti agi aku buruk ka match baju enggau skirt. Enti baju kurung nyamai... pilih aja lalu pasuk... Enti kami pengajar ulih ngena tancut panjai... nyampau meh aku tu ka bekain...


Tengahari ari dua sempat ngiga buah rian agai Santubung kin...


Ngabang agai Pudin raya terubah... Sama enggau aku ngajar...


Udah nya Cikgu Hamit ngasoh ngabang agai ia di Sadong Jaya... Tu gambar mansang. Feri bedau bejalai laban nganti ai pasang.


Tu maya pulai.... Feri kira-kira 1km ahead...


Raya kedua aku bejalai agai area Matang kin... Begambar enggau Mus, anak Ambo. Nyamai amat ngibun anak mit tu...


Aunty Nazirah enggau Pejot (geng keras maya ba Sains Miri suba)


Ba rumah Yusland (ketua pengawas kami..)

Mayuh ga bala bakih datai ke rumah maya aku ke bisi din... Nya kebuah aku rindu diau ba Kuching... mayuh bakih serta sida ia best-best magang... Mupuk dulu aku...

Kami Semadi

Kemari aku ke Ulu Sarikei laban ibu aku belian. Aku tu nadai agi megai pengarap belian tang laban ke ibu diri serta aku ka makai ikan lulun enggau pama lulun... nurun ga aku. Tambah agi ibu aku sigi bendar amat mesan ngasoh aku nurun.

Umang anang enda nurun. Bisi pama enggau ikan lulun ke lauk... (slurrrp!!!!)

Sida apai aku semadi bisi enam iku. Kami petunggal 21 iku tang semina 4 iku aja indu. Ibu aku ke tuai bisi dua iku anak laki. Udah nya apai aku, ditangkan ke ibu aku ke belian nya bisi 5 iku anak lelaki. Ibu aku ke lumur tiga bisi 6 iku anak... semina ke biak amat indu. Aya aku ke lumur dua biak siku aja anak indu. Aya aku ke biak amat bisi 4 iku anak laki. Hehehe... Ka kami tiga semadi aja meh ke becampur laki indu. Nya alai sema bala ibu aya bisi pengawa lelak amat kami ke indu. Baik agi diatu laban sekeda bala petunggal udah bebini lalu bini sida nguai. Enda patut menantu buruk gawa ba bilik mentua. Heh...



Kami semadi laban ke di asi ke aki aku ari mit sigi selalu bemanja-manja enggau bala sida aya ibu. Sema bisi jelu, pama, buah tauka nama aja utai bisi sigi dianjung ngagai kami semadi lebih agi aya aku ke bisi siku aja anak indu. Tambah agi diatu anak ia gawa jauh, kami semadi selalu ngelawa seduai ia ibu aku, nyadai anak angkat kenu. Tu tadi diberi ia pama baru... heh.. mupuk dulu neh... ka makai pama sup.

Yea YEa!! Kemisi

Seminggu agi kemisi raya.. yeayea... Ulih aku lari enda lama ari Pakan... Aku sigi enda ulih amat ga diau kelalu lama nadai pengawa din... Enti sema ari gawa, pulai ari skul aku tama ke flat lalu enda pansut agi meh datai ke pagi pagila. Semadi bisi kk tauka extra class baru aku bisi pansut baru.

Agi ingat ke Joe Martin? Kemari baju ia bisi kena latak mimit... nya aku warning ia enti baju ia kamah pagila (saritu) aku nganu ia baru. Pagi tadi beresi baju tudah tuai... sigi diberus ia. Hehehe... Laban ia ke laun tama agai lab, di ukum aku bediri ba luar. Benung aku ngajar bala nembiak bukai dinga aku bejaku ia ba luar nunda aku. Hmmm... sabar aja meh... ukum aku baru ga ia. Udah nya asuh aku tama... Rising-rising ia ari jauh lalu bekawad tama agai kelas... (ulih kita ringat agai nembiak bakanya?)

Nembiak aku menawa ka amat ngukir tubuh sida ngena pen... kadang-kadang ba endur ke kurap/gatal/telih digaga sida ukir. Ni enda makin majak kurap/gatal/telih sida nya. Kemari di anu aku baru ga sida nya. Enggi Joe suba enda nemu aku pemayuh 'pantang' ba jari ia... Diatu, celum mimit pen dibasu ia jampat-jampat.

Kemisi tu ka ke Kota Samarahan ngabas rumah aku din. Apai aku madah tirai ke dibeli aku enda manah... Ku ngasoh ia meli ke aku baru... hehehehe.... Nemu ga enggai....

Kemari kami bisi ceramah Mensiang Pun Buah. Tudah aku laban ke sigi lurus bendul enti datai ba jaku dalam dikumbai aku amat ka mensiang pun buah. Engka orang ka ngajar bakani ka ngintu pun buah.. ko ati aku din... kehkehkeh... merinsa....

Mayuh ka utai dipansut ke boss kami kemari... pasal anang enggai nyambung belajar, mesti ka bisi ripih pejalai ba pengidup... hmmm.... aku tu ka nyambung belajar baru tang boss enda ngasoh pindah.

Nembiak Aku Joe Martin

Aku bisi siku nembiak pom satu ti selalu ngemedis ke ati enti maya aku ngajar. Tang udah aku pulai ke bilik guru, aku selalu tucum kediri ngenang utai ke ngasoh kami duai selalu belaya dalam kelas.

Aku nadai gambar nembiak nya. He is quite a cute boy... tang mua selalu pera-pera. Ngeli ia kuning tang mayuh amat jaku. Burit enda ulih duduk jenuh... Enti maca dalam BI, semangat tang mayuh agi ke enda datai leka jaku.

Sari nya bup ia lenyau. Ia ngasoh aku meli ke ia baru. Aku enda meli laban ka mimit agi latihan dalam bup nya bedau digaga ia... aku fotostat aja. Enda datai sejam, nyau belipat-lipat bup ke baru difotostat. Pedis amat ati aku... anu aku amat-amat ia sari nya. Enggau gamal ke pera-pera, ngeli kuning, baju kuning, stokin but di sebut aku. Nya aku madah, ari lima aku ka meda ia beresi.

Ari lima aku nadai betemu enggau kelas sida. Ari satu baru aku betemu... nyau tekenyit aku meda buk ia disugu manah (nyau bisi jambul orang empu), baju ia burak, mua beresi. Asuh aku senyum laban ka meda ngeli ia... rising-rising ia dikumbai aku handsome boy.

Aku irau nya semina sari aja tang guru tingkatan ia madah sigi tiap ari ia sigat belama. Siti aja meh bedau berubah... agi enggai jenuh ba kelas.

BBQ ARI ENAM TI KA DATAI

Aku nesau aku nangau...
Ari enam agai rumah aku bbq...
Agai Chris... aram meh nyala... kuikuikui
Bai ja meh gari ganti...
Agai Sula... sorry enda ulih karoke
Agai bala bukai... datai anang enda datai

Enggai Jenuh

Laban ke enggai jenuh pagi tadi aku bisi ngadu ke setting ba blog. Sekali aku ka naip post aku ta seruran translate agai Hindi... Kesal ati laban enda nemu maca... Hehehehe...

Aku baru pulai ari Jakar makai mee udang... kaban lama belanja. Ia udah kereja ba Salcra berapa bulan tu udah. Taja ia selalu pulai ke Sarikei tang aku jarang betemu enggau ia. Ia madah ia bisi bulih offer nyadi lecturer ba UiTM Sabah. Bulan Nov ila ia lapor diri. Ia mujuk aku apply kin tang aku agi berunding ga.

Lengka ke cerita kaban aku nya. Kemari Pikachu ta rauh-rauh dalam rumah. Abis tunjuk jari kitai diinsap ia. Nya madi aku ngaga ke ia tusu...


Ia bisi position enti ka nusu


Enda tau dipegai butul tusu ia... baka mesia... kudi ari ko ibu aku meda... heheh

Gambar bukai...

Enti ka meda gambar kami maya kemisi sari nya tau ngelawa blog aku tu The Hornbill

Ngeruh Ai

Taun nyin kemari aku konvo kediri. Taun tu menyadi aku konvo 8 iku kami sebilik nurun. Suba laban ke fobia ba airport (airport Kuching ulih sesat, airport Sibu salah tama jamban laki) minta ambat Empidan ba LCCT. Udah nya bai Empidan raun ke Genting.... hehehe...

Cukup lelak mai bala mayuh sepi aku. Orang tuai agi... macam-macam utai enggai diempa. Nemu aja meh enti ba pasar besar ni bisi orang bejual ke utai empa baka ba pasar Sarikei. Ka ngiga kedai ke bisi nyual telu masin, nyau abis kedai makai ditama aku. Ka pen enggai, bala ibu, indai diri empu. Bedau agi maya meli barang... aku nyau bebai ke shopping bag ke besai ari siti kena ngangkut barang dibeli sida ia. Indai aku mansang mai siti beg... pulai mai 4 beg. Apai aku enggau Fred sigi ari ke terubah enggai enggau sida bejalai. "Nya aku ke enggai enggau dehhh..." ko Fred meda mua aku tension datai ba hotel.

Kasih ga meda petunggal aku enda kala dibai raun. Nasib ga petunggal aku ke sigi gawa ba KK bisi moto mai kami bejalai ari siti. Tambah agi maya nya sida ke tuai udah ba UMS magang enggau Fred konvo. Bala kami agi tinduk ba hotel. Udah nya raun-raun ba Tamu Gaya, makai mee ba Kingfisher.


Aku enggau sida Fred ngeruh ai begambar. Jubah laban ke sigi dibeli diangkut aku ke KK. Hehehe...

Ila nyambung baru. Ka pulai ke Ulu Serikai...

Gaga Ati

Utai ti ngasoh ati rindu nyadi pengajar ;

Maya meda nembiak ulih mujur dalam pelajar sida

Nembiak agi ingat ke pengajar

Maya meda nembiak ke agi mit suba udah besai (enda ngasai ke diri tuai tang sida ia majak tuai)



Aku betemu enggau bala nembiak ari Pakan ti benung belajar ba IP Gaya enggau UMS kemari. Taja sekeda sida nadai diajar aku, tang aku gaga meda sida ulih nyambung belajar sida ia. Rindu serta sinu ninga cerita sida ke nganjung diri empu melapor nadai orang enggau. Sigi gaya meh kitai ka belajar.

Mayuh amat hadiah diberi sida ke aku... Terima kasih ngagai kita empat, Simon Bantin, David Nyanggau, Edward Boy enggau Setayler Saing. Arap kita empat terus mujur, anang enggau orang ti enda manah ulah.


Bendar amat ngirup ai longan... Nyau pejam mata


Kapten Simon enggau Kapten Edward


Maya orang agi dalam dewan, kami bejalai agai Yayasan Sabah.

Ikan...

Aku pen enda nemu kemaya aku ngambi gambar tu tang laban manah dipeda enggau nyamai diempa nya aku mansut ke ditu.

Maya tu suba kami bisi ngetus ke pegung sida ibu aku. Udah ditus bala kami lalu berengkah meh nangkap ikan ke low IQ. Ke tinggi agi IQ nemu ngelepas kediri taja ngena pukat. Ibu aku enggai ngetus ambis laban sayau ke anak ikan.



Nemu nyala kita? Aku enti nadai orang tau ga dikenyadi ka. Hehehe... Nadai ga tentu ngerembai amat tang ulih nangkap ikan ke low IQ. Kadang-kadang enggau aku empu tama ke ai...


Errrmmmm.... nyamai amat tu enti diempa enggau sambal.... Udah nya irup ke ai nyur. Akai dai...

Yeargh!!!

Ehem... ehem... minggu nyin kemari aku tusah ati nurun ke Kuching nadai sen... Seminggu-minggu aku ngecik ba bank alu nadai ga duit aku masuk. Ari lima aku nurun ke Sarikei ngeluar ke duit ke bisi dia. Enggai aku ngecik balance laban bisi orang bediri belakang aku. Segan aku nadai duit dalam nya. Keluar resit baru aku meda duit aku udah tama. Oye!!! oYe!! semangat aku nurun ke Kuching.

Dua ari kami duai Fred bejalai ngiga barang ke rumah. Pemanjai, peninggi sigi diukur amat-amat laban rumah sigi mit. Barang ke dibeli enda ulih ta kelalu mayuh enggai ke nadai endur engkah.


Gambar agi ba kedai (gambar enda manah laban diambi ngena hp)


Tu Fred milih


Ba rumah tang position tu udah ditukar kami duai Fred malam nya....

Tirai ke ba living room nya diambi aku ari bilik tinduk Fred ba Sarikei. Tirai ke digaga lalu bedau tembu. Tirai sliding door ambi aku ari flat aku ba sekula (enggi aku empu, ukai enggi sekula). Laban ta kelalu panjai dilipat aku mimit di tan ngena penyepit plastik. Lapa deh.... Lekik-lekik kami duai Fred meda gaya rumah digaga kami duai...

Laban ke nadai rengka kena berapi, manduk ai kami duai meli drinking water lalu nuntum butul diri empu. Maya petunggal aku datai, ka ngirup, kami nguntin siti butul digaga ke gelas. Lapa deh. Nya aku bedau ngasoh bala kaban aku datai dulu. Sida rengik-rengik ka datai bbq.... Ila meh enti udah entap amat... tiap minggu bbq tau meh... Hehehe



Kitchen cabinet tu dibeli kami ba 7th mile. Enti masang kediri less RM30. Dua kali jari aku ka telih da maya masang. Sekali maya ngangkut ari moto. Sekali agi maya masang skru. Udah dipasang pintu bisi singit mimit... pejam mata aja meh. Tambah mega tu temporary aja ko ati din... ngelantang diri empu.



Katil aku... yea!!yea!! Jenama biasa-biasa aja... Laban Fred ke sigi diau din, master room dikena ia. Aku ngambi bilik ke lumur dua besai... (sama ja pemesai enggau ke lumur 3 peda aku)

Kami duai ngira belanja dikena meli semua rengka serta belanja bukai. Tekenyit aku udah kami duai ngira. Enda nyangka mayuh amat udah dikena. Tang aku bangga enggau diri empu laban aku selalu dicop apai indai aku nadai duit (selalu bejegau, selalu meli barang sengapa etc etc). Sida bisi meri aku belanja maya aku ngadu ke S&P Agreement suba. Ka dibayar aku baru tang indai aku enggai. Aku enti ulih enggai kelalu ngarap ke sida ia laban ngelama tu pedis amat enti apai indai masuk campur sepi aku.

Baka diatu aku ka hot hot mimit laban indai aku madah ke perabot dibeli aku enda manah. Aku pen enda nemu nama taste ia. Nya dipilih aku enggau Fred laban kami duai ke selalu agi diau dia. Hehehe.... Hot ku tadi. Laban ke enggai belaya enggau ia, aku lari ke atas.

Ka madah ke kita rahsia tang anang madah agai indai aku. Indai aku selalu ngaga peraturan ba rumah kami ditu. Enti ngirup kami bisi gelas kediri empu. Penyapu enda tau engkah sebarang... mesti position ke sama aja-aja. Gari kami bisi cara nusun etc etc... Udah la aku ba Sains Miri suba sigi mayuh peraturan, tambah agi ba rumah... apu... Aku laban ke blacksheep in the family sigi melanggar peraturan aja kerja. Enti ia nganu aku buat bodo jak. Aku enda baka Fred enggau Deb ke skema nya... kuang kuang kuang.... Geng aku, apai aku... Nya alai kami duai nyamai agi enda ngadu ke barang ba rumah. Enti di adu ke legi salah meh... (ANANG MADAH AGAI INDAI AKU!!!!)

Okay... nya aja naka ke sekali tu. Lusa ke KK.... (boring)

Hari Pengada

Gaga agi ati nyambut ari pengada taun tu laban ka mimit aja orang ke sesebelah tu nemu. Enti enda tensen ninga orang wish Happy Tua Day.. tau ka ... eee, tua dah ko ya

Apai aku call ngasoh pulai laban mummy ku ka sponser makai. Aku madah aku lelak, mayuh pengawa. Kertas jawapan mesti ka disemak sebedau kemisi.

Taja nadai kek taun tu enda baka taun taun dudi nyau sampai dua tiga kek tang ati lantang agi. Nya alai aku lembau mimit ka pulai sari tu... dibeli ke sida indai aku kek legi...eeee.... lelak amai ka nyepu dian ngemayuh mayuh nya.... Enti Duncan enda ngawa sigi ka amat nyepu dian. Aku madah ila aja meh celebrate nganti Boy bisi ko aku...

Tengah malam Julia message ngasoh aku ngaga bbq ba Kuching ujung minggu tu. Nama meh utai kena bbq ba rumah aku din... tilam aja udah dibeli madi aku. Hahaha....

Ujung minggu tu ke Kuching ka betemu enggau bala sida Julia. Aku agi ingat maya belajar suba sigi betankan tankan ari pengada kami segeng keras. Ari ujung bulan 7 ngagai bulan 9.... abis duit PTPTN dikena meli hadiah enggau birthday cake. Selalu agi kami ngaga combine birthday party awak ka jimat belanja. Endur celebrate nadai ngira alai... kala sekali ba tisi jalai... sut!!! Laban ke lapar enda ulih nganti pulai agai kolej.

Kala ga sekali sanggup ngambi geng siku ba Rajah Court pulai enda lama ke kolej laban ke enti celebrate mesti semua bisi.... Maya nya geng kami nya bisi function ba Rajah Court. Kami ngambi ia sekejap tengah malam nya enggau kami nyepu dian. Udah nya anjung baru ke Rajah Court. 3 iti motosikal kena ngambi ia... indu magang-magang. Pagi siti ditemu bala sida ke laki lalu diceramah orang bala kami.

Lucu amai ga maya sekula suba. Diatu enti betemu enggau bala sida Julia, Sula, Simba, Pudun, Dott enggau bala bukai sigi nadai kala ngasai ke diri udah tuai mimit. Asai ke baru tama matrikulasi belama-lama.... Enti betemu cerita ke sama ditusi... agi meh lekik lekik ketawa.

Diatu selalu agi kami sebuat betemu laban jedun tiga iku nya ngambi master ba Kuching. Simba konvo taun tu... Pudun enda semaya konvo... kasih tudah tuai... lalu bedau tembu-tembu tesis ia laban lecturer ia nya pen belajar baru.

Pengerami Nikah Cath enggau Brett

Wahhhh!!! Dalam 24 jam mayuh amat utai nyadi. Aku nurun ke Sibu enggau Sula pukul 2 ari enam tu tadi. Datai din kami duai lalu check in ba Premier Hotel. Nganjung barang ke bilik lalu keluar baru ngagai Sanyan... shopping. Laban ke lapar kami duai makai mimit ba Sushi Tie.


Lapar... lapar...


Lapar amat Sula tang mesti begambar dulu kena beblog

Udah nya kami duai mandi lalu begari ka nurun agai makai pengerami nikah Cath. Laun mimit kami duai laban ke black out ba hotel. Datai din sida Cath sigi udah tama duduk ba mija. Sorry Cath laun… tang manah ga laun, lalu duduk ba meja depan aku, Sula enggau kawan Cath siku ari Pakan. Hehehe…. Enti aku tumu aku rasa sigi duduk belakang aku.


Cath enggau Brett benung melah kek...

Bendar aku ngiga sida Puteri. Kena lindung tiang sida empat menyanak. Semadi aku meda Duncan nya baru aku tepeda ke Puteri. Sida udah nya duduk ba mija kami. Lalu meriah mija kami laban ulah Duncan seduai Denice.


Jenkins' family enggau Campbell's family (betul spelling nama kita tu Puteri?)


Duncan ti sigi rindu makai kek... ari pun ati nanya kemaya ulih makai kek...hehhee

Sekumbang ke makai enda nemu berapa kali black out. Nya Duncan komplen laban tiap kali black out, bunyi speaker dikumbai ia balloon meletup. ”I dont like that popping sound”

Ku meda mija ke semak kami bala cikgu-cikgu ari sekula Cath enggau sekula apai ia. Nyau asai ke makai dinner Hari Guru ja… hehehehe… Anang nganu Cath….


Enda kamah gaun di kena indik aku Cath? heheheh...

Udah begambar kami duai Sula pulai ke hotel. Meda agi tumu kami duai duduk dulu ba Bamboo House. Aku sms ngagai Cath tang ia nadai madah ke diri ka datai. Udah ai abis… kami duai pulai ke bilik lalu tinduk.

Kira-kira 20 minit ku dah jenak tinduk, handphone aku munyi. Cath telefon mai ngagai Bamboo House baru. Dalam ngantuk ngantuk kami duai Sula ngena t-shirt ke dikena tinduk nurun baru ngagai Bamboo House. Semadi ke nuan meh Cath… Enti orang bukai sambung aja aku tinduk. Hehehehe………


Mai mua agi ka tinduk...


Kemaya meh agi ulih lepak baru neh Cath?


Ryan kawan Brett. Mayuh amai peminat begambar enggau ia malam nya...

Nyau tutup Bamboo House baru kami lima pulai. Datai di bilik enda ulih tinduk agi laban udah lepas maya tinduk aku… Bendar mejam ke mata baru tinduk…. Tang dani pukul 5 laban ke dah teleba dani ka nurun sekula. Lalu ga enda ulih tinduk baru.

Tumu pagi Puteri sms mai breakfast tang laban ke udah janji enggau kawan kami breakfast di hotel aja.

Udah nya aku enggau Sula ngiga kain kena ngaga tirai ba rumah aku. Lelak amat berunding ke tirai nya… Ujung-ujung aku meli tirai purple…

Pulai meli tirai kami duai belelak di bilik aja nganti ke pukul 11:30 makai tengahari enggau sida Puteri sebilik. Kami makai steamboat ba Shabu Shabu seberai Premier. Enti bisi Duncan enggau Denice sigi enda kala enda ketawa aku meda seduai ia. Aktif amat.


Nyau bepeluh-peluh kami berapi..

Udah makai kami duai Sula pulai. Ngetu enda lama ba Farley. Udah nya ia mupuk ke Kanowit, aku pulai ke Pakan. Ari ujan lebat..... laun aku datai di Pakan.. Pukul 3:30 baru datai lalu tinduk buntau.

Lokan Tunu

Bakani kita selalu manduk lokan? Kami sebilik ta jarang makai lokan tu. Tang minggu dudi nyin kemari aku bisi meli lokan lalu nguji nunu ia. Nyadi aku kala meda orang ba Sabah din nunu ngena zink. Bendar aku ngiga zink ba rumah tang laban ke udah dijual Fred ngagai kedai recycle... nyau nadai agi zink enda diguna ba rumah dia. Nyau puas-puas ditunu aku bakanya terus. Suah meh kami duai Ibi ngidup ke api laban ai lokan majak naya...

Udah mansau... lalu diempa enggau sambal. Nyamai ga... hehehe.. tau nguji kediri.

Bendera Kitai

Fred tetemu ka bup lama maia seduai indai benung ngiga barang ka dibuai (recycle).

Tu sekeda utai ke digaga maya agi mit suba... Enggi sapa empu tu kini?




Uji kira bucu bintang nya dia.. cukup?



Betul enda ke cat bendera Sarawak tu? Hehehehe...

Rumah....

Ko jaku aku ka ngambi kunci rumah ujung taun tu ngambi ka mayuh agi ari aku ngadu ke rumah. Tang laban Fred berengkah gawa tengah bulan Julai lalu ia semina diberi 21 malam aja endur diau, aku berumban-rumban ngadu ke rumah. Semua utai mesti digaga dalam 21 ari...

Minggu nyin kemari aku ke Kuching ngambi kunci ari developer. Udah nya aku enggau Fred begiga ke lampu. Ari enam masang grille. Maya milih cura grille nya, aku semina nerima mms ari Fred aja. Udah la gambar ke di anjung enda cukup terang. Sengapa aku aja milih....

Pintu tisi... aku enggai kelalu mayuh bungai... lelak ka ngelap debu ia.


Pintu penatai... Aku enggai meda kelalu celum cat... asuh aku dicat enggau cat copper. Terubah ka ngena cat emas tang kelalu terang ko tauke nya.... silau...


Ba jendela.. aku sigi enggai meda utai kelalu becura-cura... pedis pala aku meda serta lelak amat ka nuci... Bakatu nyamai agi... sekali ngelap.

Petunggal aku di asoh kami duai Fred ngiga orang masang lampu enggau kipas. Bedau aku meda baka ni meh gaya rumah nya din... Sari nya maya meli lampu, kami duai ngiga bulb ke 23W serta burak ngambi ke terang laban indai aku sigi enggai ngena lampu kuning. Pedis pala ko ia. Aku laban ke bisi silau (ko tauke kedai cermin mata) sigi enda tentu ulih ngena lampu kuning ga... Ka tiga iti aja lampu kuning dibeli tang aku enda ingat dini alai masang nya. Hehehe....

Agi mayuh rengka bukai ka dibeli... fulus pen majak mimit... Kemisi tu kin baru ka meli tilam. Nama tilam manah neh? Any suggestion?

Peresa

Minta ampun laban lama enda update aku empu blog. Dua minggu udah nadai pulai ke rumah. Enti ba sekula tu ka pedis mimit online nama agi ka upload gambar.... Kira ke nadai gambar meh sekali tu. Enti bisi pen pulai ke rumah ila aku upload.

Minggu baru peresa bala nembiak ba sekula. Bala pengajar benung begaga ke kertas peresa. Baka aku ke sigi contract ngambi siti subjek nya sigi bendar belama ngaga kertas peresa ke sida pom 4 enggau pom 5.

Uji kita nusun leka jaku tu ke aku

menanam bunga pasu Kakak dalam pokok di

Nitih ke kreativiti kita meh... hehehehe....... ngeh.....

Kini aku ko kita????

Nadai pengawa aku lemai tu tadi. Aku mai indai aku meda pengawa orang ba rumah panjai kami din. Sigi rindu meda aja meh. Enda lama aku din... meda enda lama laban enda kala meda... hehehe...

Lelak Aku

Lelak amat aku dua minggu tu udah... Arap ke minggu dudi nadai agi penanggul. Arap ke semua mujur.

Asai ke agi ka nyambung cerita minggu nyin kemari tang runding aku bedau tentu manah iga. Nganti aku bisi topik baru ila... hehehe

Minggu tu ila bisi sekula ganti.

Lelak amat... mupuk aku

Pikachu enggau Seno

Tu meh gamal anak mayau aku ke kiut kononnya.... Ka mai Cath meda... dipangku,ka ditaban pulai. Pulai sida Cath ari rumah aku lemai 4 aribulan, birak seduai ia ba atas tilam..... eeee.... kiut konon. Birak sebarang....

Penatai Puteri

Tengahari ari dua aku tekenyit ninga Cuthess madah Puteri bisi ba rumah ia. Aku sms ngagai Cuthess ngasoh ia ngabang pagi nya. Ninga Puteri bisi ba rumah ia, aku lalu ngasoh sida ngetu ba rumah aku laban sigi dipansa. Bisi ga ati aku kesal mimit laban ke enda kala betemu enggau sida ia... semina betemu online.

Gaga amai ati aku betemu enggau sida sebilik. Aku selalu imagine Puteri tu tinggi serta besai (ukai gemu..besai) tang aku tekenyit mimit meda kami duai ia nyau ka sama saiz... hehehe. Udah aku nemu umur ia ke amai.... hmmmm.... nda ku nyangka neh.... hehehe...



Ngelama tu meda gambar sida Duncan, Denice enggau Doug aja.... Rindu amai aku ngacau seduai Duncan enggau Denice. Lebih-lebih agi Duncan ka amai bejaku. Denice tu malu-malu mimit... Doug pen pia mega... pejaku amai semina aku meh kadang-kadang enda nangkap utai ke disebut tudah tuai. Puteri meh nyadi tukang translate... hehehe...