Cerita Ari Kundasang

Aku baru pulai ari Kundasang lemai kemari. Aku agi alit ati bakani duit ke dipansut ke aku ensanus bedau dikena... agi dibai aku pulai baru ke KK.

Aku enda ga gagit amat ka ke Kundasang laban selalu amat kin tang kaban aku ari Mudong siku tu enda kala kin... Ngulu ke ia aja. Semina ngagai Kundansang War Memorial nya aku bendar amat begambar laban baru keterubah ia. Ila engkah gambar ditu. Aku nadai mai tali kabel kamera aku. PC aya aku tu nadai card reader.... Em... bisi PC fair ba KK sari tu... legi meh aku meda enti aku sempat kia. Agi nganti kaban aku J ngambi aku kitu da Putera Jaya.

Alit ati aku meda sida bumiputera ditu mayuh amat bisi kedai kediri empu. Semina ba bandaraya KK bala sida tauke enggau taukenio mayuh muka kedai tang enti aku ngagai endur bukai baka Kundasang, KB, Ranau... sida tauke nya ta bejaku Dusun tauka Bajau.

Uji kitai bejalai ba serata menua Sarawak... Berengakah ari Kuching, Serian, SriAman, Betong, Sarikei, Sibu, Bintulu, Miri, Limbang, Lawas.... tusah amat ka ngiga bala kitai bisi bekedai. Amat meh tauke nya nemu bejaku Iban lebih agi enti ba Sri Aman... tang anang saru mata sida ia sipit wai...Aku empu pen enda muka kedai... Ila enti aku dah muka kedai anang kita enda datai meli ba kedai aku.. Anang enda nyukung aku...

Sari nya aku ke Bintulu... terubah meli belacan ba kedai siti. Udah nya aku bejalai baru meda bala kitai nyual belacan.. Aku meli... nyukung bala diri ko jaku. Pulai aku muka belacan... mit amat meh belacan bala kitai tu. Nyau ringat kediri aku digaga ke bansa diri bakanya.

Bah... naka tu dulu. Ila becerita baru..

Nitih ke semaya... tu gambar sekeda ke diambi aku sari nya...


Gambar tu diambi ari Jalan KB Ranau... Enti nengah jalai tu manah agi rampa menua ulih dipeda serta ulih meda rumah Felix AF ba Kpg Purak Ogis...


Nguji nebah engkerumong orang Dusun...


Ngetu enda lama ba Kundasang meli keropok bayam, strawberry panggang enggau buah pisang.


Tu meh strawberry orang Kundasang... ukai ke dipanggang tu...


Gunung Kinabalu diambi ari Kinabalu Pine Resort.


Kami duai Empidan kala bejalai di atas din... kita deh?

Olahraga Pembangunan

Baru abis olahraga pembangunan kami kena 24-25 ari bulan tu tadi. Sekula kami bulih 10 emas... nambah ke 6 iti ari taun nyin kemari. Siku nembiak ulih mecah ke rekod belumba jalai kaki MSS Sarawak. Siku agi nembiak ulih mecah ke rekod 800m enggau 1500m MSS Sarikei. Dua tiga taun ti udah acara jarak jauh sigi mayuh pulai ngagai kami perais... Siku nembiak udah dua taun nyadi johan kebangsaan acara merentas desa (belanda ba babas)... Sigi pama nembiak ari pakan... teleba bejalai nujah bukit...

Nama agi rasia sida tu? Disiplin ti manah. Nadai kala ngular maia belatih. Bebasa ke cikgu ti melatih sida. Enda baka bala sekeda... Baru megai rekod sekula tauka bulih pingat emas sekali dua lalu enggai ninga ke jaku jurulatih... ngasai ke diri udah STAR... Enggai nurun belatih. Nadai ati ka maju.

Sambutan Perayaan Hari Kemerdekaan Ke-50

Taun tu rumah panjai kami, ianya Rh Gundak Sg Paoh dipilih ngari ke sitak Sarikei enggau orang bepekit Sambutan Perayaan Hari Kemerdekaan Ke-50 ti digaga Jabatan Kemajuan Masyarakat (KEMAS). Berengkah ari pun bulan lapan tu kemari kami serumah bergutung-ruyung ngaga nama utai ti patut. Bala sida ke indu begaga ka langsir, beriyas ka rumah lalu sida ke lelaki tadi begaga ka pintu gerbang. Bendera Malaysia digantung ba tiap pintu bilik. Bala nembiak pen bisi nulung bala apai indai ngambi ka rumah panjai kami manah dipeda serta bisi mandang ka imej Hari Merdeka

Info pasal Rumah Gundak

Tuai Rumah : En. Gundak Ahlin
Sapit Tuai Rumah : En Wilson Awit
Pemanjai : 32 pintu
Penyauh ari pasar Sarikei : 16 km
Logo




Pun penatai ngagai Rumah Gundak... Kitai ulih ngasai ke semangat merdeka maya kitai meda pintu gerbang tu.


Belon ti dipasang ba ruai kena ngiyas rumah... 5o Tahun Merdeka Malaysiaku Gemilang.


Banner ti digantung ba ruai Tuai Rumah


Ruai kitai... Datai meh ngagai Rumah Gundak kena 10hb September tu. Mayuh agi pengawa ti ka diatur berengkah ari pukul 3 lemai nyentuk ngagai malam ari.

Kena 26 haribulan 8 tu kemari kami serumah bisi ngereja aktiviti Hari Kemerdekaan. Mayuh aktiviti ti digaga baka konvoi Hari Merdeka, pertandingan mewarna, sukaneka, pekit karaoke, ceramah merdeka enggau mayuh agi ke bukai.

Ba sukaneka, acara ti bisi digaga ianya pekit nyumpit, ngaga ketupat,ngisi ai dalam botol, ngiga coklet dalam tepung, mai belon ba pah, belanda 150 meter, mai bola pingpong ngena siduk enggau bowling buah nyur. Tiap pintu nganjung siku wakil enggau sukaneka tu.


Bowling- Indai Chu (bini tuai rumah) benung nikau ke buah nyur


Sukaneka nembiak - ngisi ai dalam botol


Nembiak mit benung ngiga coklet dalam tepung


Flosy Atu mendeklamasikan sajak merdeka


Gloriana Nina mantai ke pengelandik ia ngajat


Kami serumah begempuru udah lelak ngereja pengawa ba siang ari. Meri terima kasih ngagai semua kami serumah laban cukup meri kerjasama lebuh begaga ka pengawa baik nya bala ke tuai, bala nembiak tauka anak mit.

Tu meh reti merdeka ngagai kitai serumah. Ukai semina Malaysia merdeka tang kitai serumah pen merdeka dalam ati runding enggau pendiau kitai. Selamat Hari Merdeka. Awak ka semangat merdeka tu terus mengkang dalam ati kitai serumah belama-lama ia.



Angkat semua anak merdeka
Terus ka siti ari
Terus ka siti tuju
Singkang ke kaki nuan
Terus...lurus...

Pagila, lusa, ila...
Teruska hari kemerdekaan
Padah ke diri serumah
Bekangau ke diri selangkau
Bekumbai ke diri seberai
Besada ke diri semenua
Menua tu....
Hari tu...
Dunya tu...
Ungkup kitai
Kitai semua...anak merdeka
Merdeka...merdeka...merdeka...!!!

Ngambi Tupi

Aku enda nemu nama kebuah bala kitai selalu madah Convocation tu ngambi tupi.... Enti bala kita bisi nemu tau madah.

Baru ja ngambi tupi aku ti kedua 21 Ogos sari nya.


life is not a holiday but an education - pengidup ukai kemisi tang kena kitai belajar (pelaba aku aja nya.... bad translation) Nulung aku uncle empidan... Ngulih ke Iban nuan A+. Ila aku engkah gambar tua raun ba Genting ditu.. hehehehe...

Tugu Pengingat Rentap

Sapa ti enda ngelala Rentap... Ari mit aku sigi nemu Rentap tu sigi popular tang aku enda kala nemu pendam Rentap tu ba sitak menua Pakan. Kumbai aku ba Sri Aman. Enda ka tentu nyalah ke diri empu laban nadai kala orang madah ke aku lalu nadai kala tebaca ke pasal nya.

Kemisi tu tadi aku enggau orang Larian Bersejarah Pahlawan Rentap ti diatur Jabatan Penerangan enggau Kelab Setia SMK Pakan lalu dipejadi ka YB Dato' Joseph Salang.

Ari ke terubah kami diau ba Rh Unjar, Sg Buluh Rebuh. Ari pasar Pakan kami ngena twin cab tama ngagai Jalai Wak. Kira 20 minit kami tama ngagai simpang mit. Sejam udah nya baru kami datai ba Rh. Unjar.


Bala kami sebuat ditiki enggau cukup basa ari sida Rh Unjar serumah.


Merarau belauk ke utai babas dipanduk ba buluh.


Tumu pagi kami mupuk ngagai Sg Empit kira-kira sejam ngejang ari Rh Unjar.


Tu meh endur Aki kitai Rentap bersemadi.... Cukup sinu meda endur tu enda tentu dijaga enggau manah.....


YB Dato' Joseph Salang miring meri basa ngagai pahlawan Rentap

(nyadi entubung Rentap tu dibuka... tang aku nadai gambar ia laban aku lari lebuh orang ka nyayat babi. Enti kaban aku ka meri, ila aku engkah gambar tulang nya ditu)


Rumah Ujang, Sungai Empit rumah panjai ti pemadu semak enggau lumbung Rentap.


Tu meh sekeda ari bala ucu icit Rentap ba Rh Ujang, Sg Empit Wak Pakan Sarikei Sarawak.

Pengidup Sida Ia

Kes 1

Siku nembiak enda nurun sekula dua minggu ketegal enda tembu ngaga kerja kursus Sejarah PMR. Maia kami duai berandau ia madah ia udah enggau orang gawa nunyau semin. Gaji RM25 sari. Diatu nembiak nya udah nurun sekula baru. Sigi pedis ka ngemansang ke nembiak ti nadai ati ka belajar. Tusah ati lalu sinu ke sida ia... Kasih meda apai indai ti bendar amat ngiga belanja kena nyekula ke sida.

Kes 2

Kaban aku tebaca ke surat nembiak nuju apai indai ia... Minta kirum ka duit RM10 laban tudah tuai nyau nadai duit ke belanja agi. Sinu ati lebuh aku ninga laban nembiak tu sigi mereti serta rajin taja enda entu pintar amat. Kini ke tuju nembiak tu ila enti ia udah abis pom 5? Ia manah tang kurang ari segi pemandai ia. Aku arap ia ulih ngatur idup ia empu ila.

Kes 3

Apai enggau indai ia udah sarak... Apai bebini baru, indai belaki baru... Ia diau enggau aki ini ia...

Kes 4

Anak sida ia ngaga penyalah ba sekula. Apai indai nembiak ngari ke anak...

Kes 5

Baka ni ka ngasoh anak enda nginsap, enda ngirup enti sida pulai ke rumah meda pengawa orang ba rumah bakanya. Arak rega RM2 sebutul tau dibeli sida ke nembiak bakanya aja... Sigi gaya enti ngiga untung.


DINI PENYINU BALA KITAI KE DIRI EMPU? ENDA IBUH SINU KE ORANG BUKAI... CUKUP MEH SINU KE DIRI EMPU....

Iban... Iban...

Aku pen enda nemu nama kebuah berapa hari tu aku selalu ka ringat-ringat maca utai ditulis ba messagebox aku... Enti ba message box Pejalai mayuh agi... nyau chatting bala dia... beberi ke no telefon. Keterubah aku enda ga peduli amat ke bala ti ka endar chat ba message box aku..ni nemu betemu jodoh bala sida ia... Tang enti orang nya misunderstanding... Nganu-nganu orang lalu enggai alah pemandai... malu ga aku maca. Ukai aku enda ulih delete tang ngambi ke orang bukai meda nama pengawa bala kitai Iban enti udah nemu ngena komputer enggau internet.

Kasih ga menyadi aku dikumbai orang tesat enti bejalai jauh ari menua laban tudah tuai enda nemu jaku ribai... Jakun... Sapa meh pengajar ia suba neh?

Jakun bala pengajar ko bala nembiak. Engka nya alai nembiak diatu majak jakun sejakun laban pengajar sida ia jakun. Engka bala pengajar mesti graduate ari menua orang putih baru sida ia enda jakun. Engka enti enggai dikumbai jakun kitai mesti nyadi PR ba menua orang putih. Baka ni neh... enti bisi orang putih ka ngajar nembiak ditu, ka ga aku minta PR ba menua bukai.

Pengajar bulih elaun

Baru tu tadi bisi TV3 masut ke dokumentari bala pengajar ti ngajar ba pendalaman Sarawak, Sabah enggau Semenanjung. Udah nya bisi berita madah ke bala pengajar ti ngajar ba menua ulu bulih elaun Rm500 ngagai RM1500. Mayuh bala pengajar gaga ninga nya lalu bisi ga bala sekeda ke ngajar ba menua ti alang-alang enda puas ati. Nama runding aku?

Aku setuju bala pengajar ti ngajar ba menua ulu ti nadai karan, nadai ai, nadai datai jalai diberi elaun. Aku agi ingat maia agi mit suba apai enggau indai aku ngajar ba Ulu Entaih, Julau. Tumu pagi kami mupuk ari rumah ke Ng Engkamop ngena moto. Udah nya kami ngena perau ke Bebelit. Datai di Bebelit kami bejalai kaki ke Ulu Entaih. Pukul 7 lemai baru datai di kuarters. Nya enti ai enda langkang. Aku kala enggau sida ia bemalam ba rantau jalai maia ai langkang serta kala ga kami bejalai 8 jam ari Ng. Engkamop laban perau nadai. Ujung taun 1987 perau ke dikena kami pulai karam ba wong. Aku agi ingat aku enggau madi aku Fred diau aja meda luan perau tama ai. Apai aku narit kami duai ke belakang. Udah nya aku meda basikal tiga tayar aku tenggelam enggau tin ruti perais aku bulih lumur satu tenggelam. Kami niki ngagai batu di bai ke tisi sungai. Kami nadai bebadi tang barang mayuh lenyau.

Ukai nyamai ngajar ba menua ulu. Sigi patut bala pengajar di beri elaun bakanya. Munyi ko bakih aku siku, sekali nurun, seput baka ba ujung senapang.

Tang, aku bisi ga pengirau ati... Ukai aku kepapas tang ngenang ke bisi bala pengajar ti enda tentu ransing ati ngajar bala nembiak. Menua ulu sigi pedis dilawa bala sida nazir tauka bala pegawai ari Pejabat Pelajaran Gabungan. Aku selalu ninga rita bala pengajar nadai tentu tama kelas... (rita aja... aku enggai nusui kelalu mayuh enggai ke salah).

Aku diatu ngajar ba sekolah menengah. Nembiak kami ba siti form bisi dalam seratus lebih. Kami bisi lapan ngagai sembilan kelas. Kelas ke pengujung endar nya kelas ti enda nemu maca. Enam taun sida ba sekolah rendah enda nemu maca... Baka ni kami pengajar ti ngajar Sains, Sejarah, KH ka ngajar subjek kami enti nembiak tu enda nemu maca? Sida pengajar Bahasa Melayu sigi ngajar suku kata baru tiap-tiap ari. Kami pen ngajar sida ia maca suku kata. Masuk taun ke 2 (Form 2) sida ke rajin nyau nemu maca. Nama runding kita? Mupuk aku.

Bansa Kitai Ti Kepapas

Tabi bala mayuh... Lama aku nadai pansut ditu. Lama aku nadai meri berita ngagai bala mayuh... ukai aku nadai ngabas tang aku enda nemu nama utai ka ditulis. Tang sari tu aku enggai enda mansut ke pemedis ati aku ngagai bala sida Iban ti selalu amat kepapas serta begedi ke bansa diri empu...

Uji kita maca utai ke ditulis antu ambor ba message box aku dia. Sebedau tu aku bisi maca utai bukai ke jai agi ari nya baka... pu**k di ..**tuh di... enggau mayuh agi... Tu meh bansa kitai... mantai ke penadak diri ba internet enggai ke orang enda meda.

Baka antu ambor... ia tu sigi antu... Antu ti enda nemu kati ka mansut ke gambar diri ba internet. Nama guna ia ka bejaku bakanya ngagai orang?

Diau di menua bansa diri empu ngajar aku kati ka begulai enggau bansa diri empu. Aku selama tu sigi berumah kediri, jarang di rumah panjai. Maia besekula suba aku ba sekolah berasrama penuh ukai sekula iban lalu bekaban enggau bansa bukai. Aku enda tentu ngelala ulah bansa diri empu... Ukai aku sumbung enggai begulai enggau bansa diri empu. Mimit ga bansa kitai ti ulih ngambi subjek Sains maia aku sekula suba. Enti bisi pen lawa amat... jaku tinggi lalu bisi sut sut mimit... Berapa iku ti bulih GB (gagal dan diberhentikan) maia ba universiti. Ni enda... nama dikirum ke apai indai duit... bebeli ke baju lawa-lawa, ngirup sampai palau, belajar enda.

Enda semua... bisi ga sida ti imun lalu ngemaruh ke diri... Sida ti bakanya sigi aku 'salute' lebih agi enti datai ari ruang bilik ti tusah. Sida tu sigi nyadi role model aku enti aku tetemu ka sida ia...

Diatu aku majak ngelala ulah bansa kitai... ni ke manah... ni ke kepapas... (baka antu ambor nya meh).... Aku enda pedis ati ditanya ia baka nya tang pedis pala meda penadak ia nya...

Pedis ati maca komen aku tu? Nadai guna pedis ati... that's the fact. Aku enti udah pedis pala baka tu sigi nadai pampul agi bejaku... Enti betunga mua sigi di anu aku amat-amat orang baka nya...

Au... enda ingat aku nusui sari nya. Minggu nyin kemari aku ke Sibu ngagai Daesim Supermarket. Terubah ngulu ke madi aku meli tancut. Manah salesgirl dia layan kami. Udah nya aku meda baju... nguji ke siti. Umbas tang jait ia enda tentu manah. Aku ngagai endur baju nya baru ngiga ke sama tang nadai agi. Aku nanya salesgirl dia... nemu aku ia Iban tang aku bejaku Melayu aja dulu takut ke salah.

"Dik... ada lagi stok tak baju ni? Benang yang ni keluar-keluar."
"Benang saja ni... boleh potong"
"Saya nak yang baru... nanti jahitan dia terbuka. Kalau yang ni saya tak nak beli"
"Tak nak beli sudahlah"

Nya ia... aku sigi pantang amat orang ngaga aku baka nya. Baru salesgirl nya.... kuli orang. Enti nyadi bos beli agi ia nya gawa....

"Eh... kalau tak ada stok pun jawap bagus-bagus. Kamu ni pekerja sini jangan nak lebih-lebih"

Aku terus pulai. Ari jauh aku ninga ia nyaut... "Saya cakap baguslah"

Enda aku ka nyaut agi... kapa aku nya... ukai nadai endur bukai ka meli baju. Bisi ga asai ati aku mansang baru nganu ia ngena jaku Iban. Engka ta kumbai ia bansa bukai aku. Aku ngira indu nya sigi enda cukup diajar enggau belajar kati ka bebasa ke orang bukai.

naka tu dulu.... sapa makai cabi pedas....

Engkelulut enggau Empelawa

Aram ngelala jelu mit....

Siti ni gambar engkelulut... siti ni empelawa?


gambar A


gambar B

Pesta Nanas Sarikei

Nadai pengawa minggu tu? Ka meda sida Johnny Aman, Angela Lata Jua belagu? Datai meh ngagai pesta nanas...(iklan)

Nama aja ke pesta nanas... tu baru taun keterubah aku enggau orang meda pesta nanas. Taun kedudi suba aku nadai ba serikai. Gagit amat ati tudah aku ka nurun meda pesta nanas... ka meda pemayuh nanas jual orang... Sigi pen nadai... Ke ba tebing ai din bisi meh.



Rengka ngepan.... rega pemadu tinggi Rm180. Kain celum, cura emas nya enggi aku.



Bisi ai biru..... ai honey dew ko laut ke nyual nya. Enda aku nemu honey dew biru diatu....

gossip....gossip....gossip.....

Sebana orang siku....

Ish... tusah mai begulai enggau orang ti pedis bai berunding. Nadai nemu penyalah diri.... nemu ta masam mua bepansa. Puas berunding, kapa nya... pajak ke dia meh ati ti begedi. Engka dikumbai ka ngerampas boiplen ia kini... Akai dai... sapa enda meh madah..sigi pinggai 2 mua nya meh. Mayuh amat cerita bula ditusui ngasoh bala kaban belaya. Asai ati ka mansut ke cerita ti amat enggai ke sida malu.

Pinggai 2 mua... anang baka nya wai. Kasih ke nuan meh... puas udah ka madah enggai ke nuan frust ga legi ningga cerita ti betul. Akai dai... ukai nuan ko ia nya wai... orang bukai. Tang enti nuan keran ati, pajak meh... engka dudi ari ati ia tekuing. Ko kitai... Ukai ka nyurut ke diri tang sigi ari suba sigi enda enggau ba adan, mina meda ari tisi.

Nganti udah ujung taun

Apu!!! Amat lama nadai berita neh... Nama rita kita? Aku tu ka madah 'busy' tau ga tang bisi ga orang bukai ti busy agi ari aku ulih meh ngirum berita neh? Ke batang endar aku nadai mayuh idea ka dipadah ngagai kita diatu. Ila meh... nganti aku udah abis belajar ila aku begulai baru enggau kita ditu... Ujung taun tu...

Ngabas Pendam Niang Aki

Pagi 30 hb sigi ari kami serumah ngabas pendam. Aku nadai kala enda enggau sekumbang aku bisi ba menua. Ukai selalu... sekali aja setaun. Ukai enggai ngabas selalu tang kitai bela nemu, pendam kitai Iban sigi jarang ba tisi jalai... din... jauh ba dalam babas... sapa berani kediri...

Datai ba pendam meda langkau niang aki nyau ditinggang kayu. Em... sida aki sebilik enda tau disemin... Enda nemu nama pemali... Nya alai pendam tudah tuai digaga baka nya aja.


Aku benung possing ba langkau niang aki udah abis meresi ke pendam ia.

Aki sepiak indai aku tu nadai kena 30 aribulan 10 1993, sari sebedau aku pulai ke menua. Nadai sempat aku betemu enggau tudah tuai. Ia nadai maia tinduk...


Lelak amai ngeracun... hehehe...


Nadai pengawa, ngambi gambar aja...Daun tu tumbuh ba tiang langkau niang aki.

Ni bala kita bukai, udah ngabas pendam kita? Enti bedau tau ngabas diatu... Anang enda ingat ke orang ti udah ninggal ke kitai...

Mupuk aku...

Pejalai Sekumbang Kemisi 1

Keterubah aku meri selamat gawai ngagai semua bala kitai Dayak. Enti bisi bala ari Sabah ti ‘tesat’ ngagai blog aku tu... Kotobian Tadau Do Kaamatan. Aku baru pulai ari Kuching lemai kemari. Udah abis kelas urung jam 12 aku enggau Cikgu Rasia (jurulatih olahraga negeri) ngagai Satok, ngambi duit lalu ngirum ka duit. Aku betemu enggau Martin ba Maybank enda lama.... Kasih tudah tuai... dua bulan udah di Kuching, dikumbai aku ba KL ngelama-lama tu. Nadai aku kala ngiga ia sekumbang aku ke Kuching. Semadi kemari aku bisi telefon meri Selamat Gawai... baru nemu ia ba Kuching.

Em.... Chulling Atay ulih enggau SUKMA tang betanding ngari ka Polis. Enda nyadi meh Cikgu Rasia pulai Gawai, ke Kedah ia 30hb tu... Meli ole-ole ko aku... hehehe... Enti enda laban Gawai, bisi ga ati ke enggau. Hm......

Pulai kemari ngena bilun ngagai Sibu. Sebedau nya shopping ba India Street enggau ba Parkson. Sekali meda wallet... tinggal RM100... “pulai tua,” ko aku ngagai Cikgu Rasia. Pukul 5.00 datai ba airport... beguai-guai aku check in... dah nya ngiga departure hall... sesat enda lama.... malu mai, airport mit bakanya pen ka sesat.

Aku ba gate 3. Takut enggai ke sesat baru, aku nanya ngagai officer dia... Datai ba gate 3 aku tepeda ke siku mensia baka sulu lama suba... Terus aku sms ngagai kaban aku.... ‘buat bodo jak’ ko ia... Takut mai ia aku ka ngebom airport ngaga hal hehehe... Aku belalai enggai ke ia meda aku kenu ko jaku... Sekali tama dalam bilun, nemu ta orang bukai...hahahahah... Sut mai... ko aku nganu diri empu. Datai ba Sibu...pedis ati aku ngagai Fredy, nyambut aku baka ka lama enda betemu.

Aku bisi ngirum ka tebaloi, sago enggau lada ngagai kaban aku ba Sabah... Nya anak madi kaban aku madah sago nya lauk mayau...Baka whiskas kini... Bendar kami duai Cikgu Rasia ngajar bakani ka makai sago ngagai kaban aku nya... Irau ke sida meda lada nya baka sago, aku call baru enggai ke sida makai lada baka makai sago ga.

Petunggal Cina aku (udah belaki) bisi ditu. Terubah ia aku bejaku enggau ia...lelengau ga lama mai enda betemu... Udah nya nyau besebut ka hal belaki bebini... pansut aku. Duduk ngaga blog nyamai agi ari ninga utai bakanya... Baka ke nyamai ka ngiga laki ko sida neh.... eee... ringat aku tu... hehehe...

Gawai & Pilihanraya

Aku baru pulai ari Miri minggu nyin kemari enggau nembiak belanda. Lama amat aku enda pulai ke Pakan. Nadai tentu nemu rita orang din... bulan nyin kemari bisi pesta berambeh ba Pakan. Nadai aku ulih enggau. Maia aku di Miri, bisi pengajar siku ti sama enggau aku ti nganjung nembiak belanda madah CM ka datai ke Pakan 10.5.... Ulih meh aku meda orang sekali tu ko ati aku din..

Bilun engkabang ko nembiak aku...



CM betabi enggau bala ti datai nyambut ia ba padang SMK Pakan

Bala pengajar bukai mai aku ke pasar meda pengawa orang din. Sida ia mai motosikal magang-magang. Aku enggai mai moto aku laban nadai endur parking. Pupud mansa maia aku ka pulai ke rumah mai aku ke pasar nepan motosikal ia. Terima kasih pupud.

Mayuh amat orang ba pasar pakan lemai nya...

Nyadi CM datai laban ia merasmikan daerah kecil pakan ngagai daerah penuh.

Em... lekat ba tiang lampu ga...

Aku ka ke Kuching lemai tu... bisi kuliah aku pagila

Bulan Tiga Udah Pia?

Apu... nyau lelengau ke bala kita aku... baru sari tu aku bisi ari ka ngabas blog bala sida cath, chris, jatt, dunstan, puteri, daradesa etc... Tacuh endar bala ba message box peda aku... Berasai endar aku lama enda enggau bala.

Baru pulai ari Kuching lemai tu. Pagila tumu pagi mupuk ke sekula. Sekula kami peresa minggu tu... kira ke lempung mimit meh pengawa...Minggu nyin kemari sigi lelak amat sepi aku. Tambah agi aku diasoh orang ke Kuching nyadi jurulatih nganti kawan aku. Tang udah nya aku dipadah kerani kami kawan aku nya enda ulih diganti laban tiket bilun udah dibeli. Kumbai aku naka nya aja meh tadi. Kemari... benung aku duduk meda TV enggau kawan aku ti sama belajar enggau aku diatu(ia diau ba Tabuan), telefon cikgu siku nanya nama kebuah aku enda melapor diri ba pusat latihan. Sebening pala aku laban nya... ni enda... siku ngasoh aku nurun, siku agi madah aku enda ulih nurun.

Enda aku nemu baka ni diatu tang aku nganti surat hitam putih aja. Enti pihak atasan ngasoh nurun, nurun meh aku... taja pen mayuh amat pengawa disepi aku tang nadai ga ka ngaga alasan enggai nurun. Sigi udah tugas kitai... suba maia ka nyadi pengajar, dikangau interview ukai main agi madah ke diri sanggup tu sanggup nya... Bisi meh bala sekeda, asoh orang ngaga kerja mimit lalu madah ke diri mayuh pengawa. Baka sida aja ke gawa... orang bukai enda.

Aku diatu bejembui aja-aja. Nadai pengawa bukai. Nyau majak ke celum...

Sari nya maia Valentine Day ka aku update blog aku tu tang enda ingat ke sari nya VD.. Semadi kawan aku siku mansa aku ba padang.. Grace, happy VD... ko ia. Nya baru aku ingat. Malam nya enda ingat baru ga aku... tusah mai udah tuai tu... hehehe...

Bah, naka tu aja meh dulu. Nadai gambar... Ba pc bukai gambar baru aku... Ila meh aku engkah gambar mayuh-mayuh. Mupuk aku....

Nama Penyadi Pengidup Aku?

Apu!! Cukup lelak aku berapa minggu tu udah tang aku udah besemaia enggau diri empu ari suba, bakani pen aku lelak aku enda tau nikal baru.. Taun tu mesti diabis nitih ke diatur aku taun nyin kemari. Lelak sigi lelak...

Aku enda nemu nama kebuah aku berapa ari tu selalu berunding sampai tengah tinduk pen aku tedani lalu bendar amat aku ngingat ke jalai pengidup aku. Kadang-kadang nyau stress asai ia tang orang bukai meda aku baka nadai masalah... hehehe...

Okay.. naka tu dulu. Ila betemu baru

9 ari udah ba 2006

Enda berasai udah 9 ari kitai ngejang ba taun baru tu... Amat lelak diatu sepi aku.Enti ulih asai ka nambah 34 jam sari ngulih ke lama agi diau ba rumah, begulai enggau diri sebilik, begagai enggau ukui dua iku enggau mayau 9 iku.

Agi ingat ke pekit lagu ko aku suba? Pukul 6 pagi aku tinduk sari nya. Arap taun dudi nadai ngaga tu agi meh. Enti ngaga pen arap ke rumah panjai kami nya diberi projek elektrik enggau jampat laban tusah amat kami ngaga pekit baka tu nadai elektrik. Ia ga ai pen nadai... ngarap ke ai ujan aja kami serumah... Ka enda ngaga, enggai ga nyadi. Pajak ke dia meh...


Nya ia bulih... pama endar indai sanu tu neh...


Tu bala ti enggau bepekit... lawa orang wai...

Malam nya bisi ga orang belaya. Nya meh utai ti enggai dipeda aku amat-amat ba bala kitai maia bisi rami. Orang bukai enti rami sigi rami meh... gaga ati. Enggi kitai... kena pecik ai mimit lalu ka ngeju ke pangan... Tu utai ke dikerindu bala kitai pia? Udah nyata... enti pala sebingau, bala kitai sigi udu amat ka berekak, belaya. Baka ni wai? Nama runding kita? Enti aku madah,anang kelalu mayuh ngirup, sigi bisi orang ka nyaut aku.... ngirup tu sigi pengawa asal kitai ari suba. Nadai ulih diketu ke pengawa nya... ko bala sekeda legi. Ulih enti ka wai... baka pegawa asal kitai ti bepumpung ke pala... ulih ga kitai ngetu. Enti enda, lama udah pala aku dipumpung bala sekeda pelaba aku...

Nyau sakit... baru bala bisi ka ngetu. Manah ga nya dipeda aku tang kadang-kadang berunding ga aku ke bala sekeda ke nemu maca, nemu nulis, pelajar tinggi... isa ga bala ti nadai sekula... engka enda nemu pasal penusah ti tau nuntung enti majak ngirup.

Anang ringat wai... sapa ringat, munyi ko orang... makan cili dia rasa pedas. Aku bejaku tu secara terbuka.. nadai nuju ngagai sapa-sapa. Laban penyinu ke bala diri... kasih meda ulah bala ti nadai berunding ke pemedis diri maia berekak...Ko jaku ngirup ngambi gaga ati tang pengujung ngemedis ke diri. Mupuk aku....

Selamat Tahun Baru

Lama nadai rembus ngagai menua diri empu laban ti kelalu mayuh pengawa ujung taun tu. Bisi semalam nya, pukul 6 pagi kami sebilik tinduk laban ke bisi pengerami ba rumah panjai kami. Baru ka lelap mata dani ga baru laban kaban aku dah telefon ngasoh ngabang ke rumah anang enda-enda. Lemai nya nemu rita kena aya aku nadai... nyau ga aku nganjung indai aku kin... Cancel magang-magang program aku malam nya. Pagi siti tumu ga aku ke Betong laban kaban lama maia sekula suba nikah. Ka nurun malam aja, nadai orang ngambi gambar aku legi, ko ia telefon seminggu-minggu nya.

Pulai ari Betong aku sengaja nutup handphone ngambi ulih belelak mimit... sepi aku dani pagi nya isi nyau angat... rekung ga pedis. Engka laban udah dibai makai rian sebedau nya. Ka sari tu aja meh aku bisi lantang mimit asai... Bisi ini aku enggau aku ditu, enda ga aku sunyi amai.

Pagila udah taun baru... Nama azam kita? Aku nadai mayuh azam semina ka ngemansang ke diri empu... Aku rindu ke pengidup ti simple.

Udah berapa taun tu udah aku bisi berunding ke ulah kitai mensia. Aku kala ditanya.. nemu nuan sanu bla bla bla? Kemaia bla bla bla? Bisi bla bla bla? Aku antara orang ti paling mimit nemu hal tepi kain orang bukai laban aku sigi enda peduli iga ke personal life orang. Ba nama ia personal life... Kira ke privacy meh. Ari suba aku sigi jarang ka nemu hal orang tang maia diatu environment nyau berubah. Enggai aku nemu bisi ga orang ka madah.

Bisi kaban aku empu, paling bahaya meh ia tu dipeda aku. Ia sigi manah enggau orang... selalu menasihati orang ti bermasalah tang masalah orang nya sigi enda selamat ba jari ia. Aku tu selalu amat dipadah ka ia rahsia orang ti selalu berandau enggau ia. Kadang-kadang nyau takut aku nyimpan kelalu mayuh rahsia orang. Nyamai agi nyimpan rahsia kediri. Aku selalu nanya.. nama nuan ka madah ngagai aku enti nya rahsia? Saut ia... nuan anang madah orang bukai au? Enggau aku rahsia sigi selamat tang bakani enti ia madah ngagai orang bukai pen bakanya neh?

Lengka ke kaban aku nya... Cerita bukai

Dalam pengidup, aku bebasa ke pengidup orang bukai. Aku pia mega ngarap ke orang bebasa ke pengidup aku. Aku selalu meda orang ti enda bebasa ke pengidup pangan diri, ngacau pengidup orang bukai ngejung ke orang nya nyau dituntung penusah. Ari ke ngacau idup orang bukai manah agi kitai ngemansang ke diri empu... Aku ninting taun sigi berazam bakanya... siti ayat ti meransang aku... belanda nuju adan

Pemutus PMR

Kemari madi aku nanya kemaia aku ka meda pemutus PMR petunggal aku. Laban ti kelalu lelak aku ngasoh ia telefon aja ngagai apai ia empu @ aya aku. Lembau amat aku ka nurun ke sekula petunggal aku nya. 4A, 3B, 1C. Manah meh nya ko aku... enggai ga ka madah enda manah laban tudah sigi kurang mimit. Enti madi aku bulih pemutus bakanya sigi tusah ati apai indai aku ga...

Bala bukai bisi ga 7A, 1B... 7A,1C... 6A 2B... Nama B ko kita? Bahasa Inggeris... Nya ko ati aku din... ari suba aku ngasoh kita belajar Bahasa Inggeris mayuh amat ga alasan bala sida...

Tadi ibu aku nanya bakani ke aliran ti manah diambi petunggal aku pom 4. Aku enda tentu ngasoh ia ngambi aliran sains laban Math Science enggau English ia nadai A siti. Tang ia empu ka ga nguji... nya aku madah... enti nguji anang alang-alang. Tucum aja ga tudah tuai... Aku bisi pengirau ati tang aku meda ia yakin amat enggau diri empu. Nadai ga cara bukai enti tudah tuai ka nguji... asal ka usaha...aku sigi nyukung. Enti buruk belajar sigi nadai jalai ka bulih pemutus peresa ti manah.

Udah 10 taun baru beserara

Dua ari ti udah bisi kaban aku nganjung email ngagai aku. Ia madah ia enggau kaban siku agi ke Kuching ujung minggu tu. Ia bisi madah ka ngetu ba Sarikei suba tang aku pen ke Kuching minggu tu ila. Nya alai aku mai ia betemu ba Kuching aja enti bisi ari. Aku nanya kemaia ia pulai baru laban ujung minggu nadai ari aku ka betemu enggau seduai. Nya ia madah engka pulai ari dua. Bisi ga ati aku ka numpang seduai pulai tang ninga siku nya engka enda nyadi ga enggau laban agi bisi badminton match. Ia bisi ga mai sertai tang aku irau laban ia tu bisi pangan... enda nyamai ga ati.

Aku nganjung sms ngagai ia udah nya madah ke diri enda ulih enggau sida bejalai ke Kuching. Pulai engka ulih aku enggau ko aku... nya pen enti bisi orang bukai enggau. Laban kami duai sigi rapat, aku terus terang enggau ia madah nama kebuah aku enggai enggau ia pulai enti kami duai kediri. Dia ia madah seduai pangan ia udah beserara. Tekenyit aku ninga laban seduai udah kelalu lama bepangan... lebih 10 taun enti aku enda salah. Mayuh udah pemedis, pemerinsa, pengaga disepi seduai ngelama-lama tu.

Aku enda ga sampai ati ka nanya lebih-lebih taja pen ati aku din sengit-sengit ka nemu nama kebuah seduai beserara, sapa dulu mai beserara?

10 taun... puas aku berunding... Munyi ko lagu... anang bepangan kelalu lama... Aku sigi enda teleba pangan lama ia nya. Nya aku mina meri jaku peransang ngagai ia aja. Tambah mega ia ka berengkah kerja taun baru ila... nya aku madah... ila bisi nuan tetemu ke indu ti patut enggau nuan.

Buk

Aku ukai orang ti selalu ka nyimpan buk lama-lama. Enda datai 3 bulan sigi digunting aku... macam-macam stlye ka digaga tang pedis ga enti udah kerja tu. Enda tau kelalu iga ngaga buk...

Kadang-kadang enti buruk ka ngadu ke buk, tancang setengah aja... pama meh ulih ngelindung rekung ngambi ka enda celum iga kena panas. Enti kerja buk mesti ditancang...

Ujung taun tu aku ngempat buk aku pandak baru... lelak amat nyaga buk panjai... diatu aku belajar baru, nadai ari ka nyugu buk lama baka suba... ka jimat shampoo meh...

Buk dikempat pandak... mayuh orang madah aku nyau baka nembiak pom 5. Manah meh nya...

Bungai Mata Panas

Siti agi bungai ditanam aku ba rumah... Sunflower/Bunga Matahari/Bungai Matapanas... Bungai tu nyamai agi ditanam tang enda tan lama... Udah bebungai, ia lalu mati. Bungai tu ditanam ngena leka... kuaci ke selalu diempa kitai digaga ari bungai tu meh enti bisi bala enda nemu.


Bedau ngerembai....


Bungai tu enda ngerembai serentak... ia selalu ngerembai ari baruh dulu...


Udah bisi indu utai nutu...


Ngerembai penuh...

Bungai

Aku sigi rindu betanam ke bungai. Enda nemu nama kebuah... ta lain hobi aku diatu. Engka laban umur nyau majak biak kini. Suba mina nganjung orang aja aku meli pasu bungai, meli paung bungai.

Tu siti bungai ke ditanam aku enggau indai ba rumah... Aku agi nganti bungai matahari aku bebungai.

Buah Mawang

Udah aku tembu ngaga assignment tadi aku lalu online. Meda-meda blog lalu meri komen ba blog orang bukai. Oh ya... madi aku pulai kemari... rami kami sebilik makai lemai taja pen ka lima iku aja...

Benung aku ngiga gambar ti ka dipansut ke aku ba blog aku tu, datai bini tuai rumah nganjung ka aku buah mawang. Kemari maia ia ngambi paku ikan ba belakang rumah, aku bisi mesan ngasoh ia nganjung ke aku buah mawang... Ia ngasoh aku ngambi ke Tamu terus laban ia bejual din sari tu. Ngalih ari tadi ia telefon ke rumah meda aku lalu bedau datai. Nya aku ngasoh ia nganjung terus agai rumah...

Aku selalu meli ari ia... kasih ke tudah tuai tang enti aku meli seringgit sigi diberi ia mayuh amat buah baka rega RM3. Kemari aku udah madah, meri aku nyampau ke rega seringgit aja... Sigi dianjung ia ke aku rega seringgit tang enggai dibayar... Nya aku enda rindu amai, ko aku ngagai ia tadi. Nadai ngawa nya deh.. ukai selalu aku meri nuan buah mawang, pia ga saut tudah tuai.

Nyamai amat buah tu enti digaga ke sambal belacan... mawang mata tu.... bedau mansau.. akai dai..

Lelak amat

Baru datai ari Kuching aku. Lelak amat laban berengkah ari Hari lima aku mupuk ke Kuching, lemai nya lalu bejalai enggau bala bakih, nguntin buk, lelak buk panjai. Malam nya Simba seduai Pudun datai ke rumah aku ba Matang... bisi berandau mimit ko Simba. Udah tembu berandau kami empat Ulau ngagai Siang-siang Matang, makai malam. Benung makai dia Ezra, kaban kami ti bansa Penan sms aku... madah ke diri merajuk laban aku datai ke Kuching nadai ngabas ia.

Udah makai kami empat lalu ngabas sida Ezra serumah (Diana, Doreen, Alice, Danny, Carol) ba Kpg Tunku. Kira-kira sejam dia, kami pulai ke rumah diri empu.

Pagi hari enam aku lalu nurun ke kelas... Tengah hari aku ke King Centre..ko jaku ka betemu enggau Dr. Chen sebedau ia pulai ke Penang. Enda ga ulih betemu laban pukul 2 aku nyau bisi kelas baru.

Pandak ke cerita, kelas aku abis pukul 10:30 malam lalu ngambi bala sida Ulau, Diana, Doreen enggau Alice ba KEC laban sida enggau sambutan Pra Natal. Pukul 12 baru datai ba rumah.

Pagi hari minggu aku nurun kelas baru tang tumu kami abis sari tu. Aku lalu ngambi Simba ba BDC, berandau enda lama enggau apa - mak ia sebedau naban ke ia pulai ke Matang. Bala ka piknik tang meda ari nyau ka ujan... enda ga nyadi. Malam nya bala sida Ezra mai dinner ba Tokyo Seafood tang kami tiga, aku, Simba enggau Ulau nurun ke SIB Satria Jaya, enggau bala nyambut Pra Natal... Udah abis refreshment ba gereja... kami empat, Pastor Ambrose supper ba Tabuan...

Pagi tadi Ulau tumu-tumu udah tekurung ba bilik laban pintu jai... Laun tudah tuai kerja sari tu. Udah nganjung ia kerja baru sida aunty nganjung aku ke terminal bas... 6 jam baru datai ba Sarikei...

Patut enda?

Aku selalu enggau bala besaut ba rumahdayak topik patut enda nyebut nama entua? Ukai nama aku berminat laban aku meda kadang-kadang bala kitai kelalu ka ngelaung ari nyebut nama entua sampai orang enda nemu utai disebut. Sebedau aku bejurai ke penemu aku, dulu aku minta ampun laban aku nemu utai tu kelalu sensitif ba bala kitai...

Ukai aku madah kitai tau nyebut nama entua.... Aku tu bedau bisi entua tang enti bisi jemah ari ila ngarap ke entua aku open minded. Anang ngumbai aku tulah enti tesebut ka nama. Baka ni kitai ka bejaku enti nama entua ta selalu amat ka disebut baka nama Dan? Enti orang ti gawa ba endur bukai engka ulih ga ngelaung ngena jaku ribai... baka ni bala pengajar lebih-lebih agi guru BM tauka sastera? Enti nya pen dikira tulah.... nyamai ngiga entua ti ukai nama bakanya. Hehehe....

Nama reti enti ngelaung ari nyebut nama entua tang enti bejaku sigi ngena jaku jai belama-lama eg. "dadak amat nuan tu" ? Nama reti adat basa enti semina enda nyebut nama entua tang bejaku ngena jaku jai beari-ari enggau entua?

Baka ni kitai bebasa ke entua? Ukai sema entua aja tang orang bukai ti begulai enggau kitai. Aku selalu ninga bala kitai enti bejaku ta selalu amat nyebut jaku ti enda manah... Uji pulai ke rumah panjai... bala indai selalu amat nganu anak sida ia palui, dadak, beli.... ni enda anak sida nyau nyadi bakanya... indai diri empu nyebut. Laki bini bejaku jai... dini adat basa?

Anang nganu okay..tu semina pendapat aku aja... Pendapat ari orang ti bedau bisi entua... hehehe....

Em....

Biar nyawa ba ujung senapang
Biar lesi ba mata pedang
Biar mata dilamun sebun
Sanggup nenggam bara api sampai nyadi arang

Baka Ni Tu?

Ukai ka bejai, ukai ka nganu tang tu meh realiti dalam pengidup kitai... Semina digiga maia bisi penusah aja, enti bisi utai ka ditunduk ka.

Nadai peduli amai enti orang enda bejai ba belakang... kitai idup ukai kediri. Besukung, besaup meh enggau pangan diri ngambi pengawa berat tau nyadi lempung.

Tang udah ngasai ke pemedis digaga baka tu... maia bepansa nadai ka nanya, maia bejalai nadai ka mai, maia jauh nadai ka nganjung berita tang maia bisi penusah sigi digiga. Enti enggai nulung lalu dipejai ba mua orang bukai...

Bala Majak Mayuh

Diatu ati makin teperindang ulih maca mayuh blog ti ngena jaku Iban baka sida Cathess, Puteri enggau Aki Gerubi. Aku cukup teperansang meda sida ti udah diau ba menua ribai din enda ninggal ke jaku asal diri empu. Bah... ni agi bala kitai ti bukai? Lapa enda berengkah ari sari tu ngaga blog ngena jaku diri? Ngarap ke madi aku ulih ngaga maia ia pulai kemisi tu ila.

Suba & Diatu

Hehehe.. enda lama aja aku ka mantai ke gambar2 lama suba ba ditu. Sorry!!!!!

Indai aku nyua ke aku gambar2 lama aku suba... Nama agi... ketawa aku meda gambarnya. Rindu amai aku meda.... maia agi mit suba, sigi rindu begambar...

(nadai gambar)
Gambar maia primary 6. Begambar kena masuk Form 1. Besai amai cermin mata nya... enggai ke enda ulih meda utai ditulis cikgu ba papan tulis

(nadai gambar)
Gambar kad pelajar maia Form 4.

(nadai gambar)
Gambar maia udah kerja. Serius mimit...

(nadai gambar)
Gambar kemari.

Bakani gambar maia udah tuai ila kini?

Bejalai enda lama

Enggai enda madah ke kita... aku engka nadai ngabas blog aku tu dalam kandang seminggu tu ila laban aku bisi bejalai ke bukai. Enti aku bisi ari, ila aku update ari nyin. Enti nadai ari... minggu baru bisi aku pulai.

Arap kita semua mujur dalam semua pengawa lalu tau ga nyukung aku dalam sampi. TQ....

Jaku Peransang

Minggu nyin kemari indai aku bisi nusun bup-bup lama aku ba stor. Dia ia tetemu ka bup autograf aku maia aku pom satu suba... maia nya aku belajar ba SM Sains, Miri. Lama aku udah ngiga bup aku tu laban enti suba aku sigi rindu maca jaku perangsang ari bala sida ke Pom 6 ti ditulis ba bup aku tu...

Tu sekeda ari ke ditulis ba autograf aku. Aku enda enda nemu bagi sida ti nulis laban sida semina ngaga signature aja...

Grace, ingat ulih nuan pesan aku. Belajar bebendar maia peluang bisi. Nesal diatu bisi guna tang nesal dudi nadai reti. Ngajih ke nuan mujur sekula lalu datai ngagai sekula ti tinggi. Awak ke maia dudi ari bisi ngiring bansa Iban rebak baru enggai ke jauh tinggal pemansang laban orang. At your age, study should come first. Meanwhile relationship have time to cultivate (bedau maia ia) -DSP Upper Six Form 93, Jalan Gambir, Sibu

Hai Grace... Ingat ke pesan aku di baroh tu :
1. Belajar bebendar
2. Selalu ingat ke Petara
3. Anang gila orang laki - empai maya ia.
Penudi endar, arap ka nuan mujur dalam PMR 1995 ila - MJ, Kapit

Sis Grace!Brother arap ka nuan belajar meh enggau bebendar awak ka enda nesal dudi ari. Pea mega aku arap ka nuan mujur dalam semua pengawa. Jadikan setiap kesilapan sebagai pengajaran seperta kata bidalan Inggeris ini : "An intelligant person learns more about rebuke than a fool learns from being beaten a hundred times". Alway pray to God serta ingat meh ka pesan apai indai nuan. Peda Hebrews 12 : 7-8 - X-KP, Sematan, Lundu

My Dear Sister Grace, nadai orang ulih ngubah pengidup kitai enti enda diri empu lalu anang enda ingat idup kitai semina setaun dua aja tang lebih ari nya. Pemedis pemerinsa enggau pengelelak ti di asai ka ba sekula enda lama enti dibanding ka enggau pengidup dudi ari. Tu siti ari 'invesment' untuk masa depan. Ransing ka ati lebuh maia belajar anang guai ngerunding utai bukai laban kitai udah jauh amai ditinggal ka orang. Selalu bepanggai ba Tuhan dalam semua hal lalu Tuhan deka nunjuk jalai ti lurus ngagai kitai - Rh. Numpang, Batang Ai.

Enti sema kita ngelala tauka kita empu orang ke nulis tu ke aku suba... aku meri terima kasih ke jaku peransang ti diberi kita ngagai aku suba. Aku agi ingat... maia aku agi pom 1 suba... sigi agi mit amat maia nya diau ba menua orang. Enti maia kemisi, aku enda pulai, aku selalu begulai enggau bala sida pom 6 kelebih agi Kak Ipah enggau Kak Jen. Sida selalu mai aku belajar ba kelas sida... nya aku ngelala mayuh agi kawan-kawan seduai ia.

Setaun aja aku begulai enggau sida. Udah STPM sida nadai agi ba sekula. Maia aku ba uni... 6-7 taun udah nya bisi ga aku betemu enggau sida... Apu... nyau dara nuan Grace

Diatu aku enda nemu dini endur sida... Arap ulih betemu enggau sida baru... bro and sis, thanks.

Buah #3

Buah ucung agi mata....


Buah ucung udah mansau...

Buah...#2

Agi ingat sari nya aku aku bisi madah pasal bungai buah? Udah aku ngabas kebun ba belakang rumah, enda ingat ke bungai rian lama udah rarah.. nyau udah belanggu rian diatu.

Semina tu aja meh gambar ke bisi diambi aku lemai kemari. Laban nyau udah serpan, pulai kami duai Blackie, takut tesat...hehehe...


Bungai nyekak @ pakan... bau ngelu...


Tu dikumbai kami semenua buah uchung... Enti udah mansau mirah buah ia...


Buah langsat...


Blackie...


Daun bungkang... dikena kitai manduk lauk-lauk dagin.

Ngambi Indu

Pagi tu benung aku ngemas rumah, dia aku tepeda ke gambar-gambar lama maia orang ngambi aku indu mudik ai Julau... Enda aku nemu endur tu laban bala sida tu enda mai aku, agi ba sekula aku maia nya enti enda salah aku.


Baru ka bekejang... ba ili, ai keruh...


Ngetu ba rantau jalai... merarau...


Udah datai ba endur ti dituju... bala ditiki enggau adat Iban... pelaba aku meh.. aku enda enggau maia nya.. hehehe...

Pekit Karoke

Nya ya... lemai kemari bisi bala sida tuai rumah datai ngagai kami sebilik, berandau ke ka ngaga pekit karoke ujung taun tu ila.... Aku laban ke ka nurun ke pasar mina ninga mimit aja. Pulai ari pasar baru aku nanya indai aku.

Asai ka ga ati tu enggau orang ngeruh ai... Aku tu sigi enda kala enggau orang pekit karoke... Kala ga suba, maia agi sekula... wakil rumah sukan... bulih lumur 3. Maia ba matrik wakil kelas bulih lumur 2... Hehehehe.... Malu amai tang laban nadai orang bukai... enti enda nganjung wakil kena ukum ko sida penganjur.

Nama lagu ka dibai aku neh? Uji kita meri buah runding kita ngagai aku.... hehehe... Luput bala bakih ninga aku enggau orang pekit karoke tu ila...