Buah Jelai/Jelayan

Agi ingat minggu nyin kemari aku bisi madah buah jelai tauka jelayan? Ari minggu sari nya aku bisi ke Tamu Nyelong ba Serikai. Dia aku tetemu ka aya siku nyual buah jelai. Seringgit setumpuk...


Tu meh buah nya... Isi dalam nyin kuning, masam (nitik ai liur)... Enda ingat aku ka ngambi gambar isi dalam ia. Sekali aku ka ngambi peda udah abis diempa bala...

Kebun Lada....

Minggu nyin kemari indai mai aku ngabas kebun lada. Mayuh ga utai udah ditanam ba kebun tu... maia aku ngabas, laban bedau tembu diracun, agi repa... kasih ga meda lada nyau kuning lama enda dibaja.


Tu meh pun lada (Piper Nigrum L.) Bala aya enggau ibu... enti bisi bala anak enda kala meda pun lada...asoh meda blog aku tu. Kasih ga bala kitai... kitai ke nanam lada... udah nya kitai ga meli serbuk lada ba kedai... lapa nda ngaga kediri empu neh...


Buah lada. Enti dijembui terus udah leka diserara ari tangkai... nyadi lada celum (lada hitam)... Enti leka direndam ba ai... kulit luar dibuai... nyadi lada burak(lada putih). Rega lada burak mar agi ari lada celum laban proses ngaga ia lama enggau tusah agi.


Pun lemba (Cucurligo Latifolia ari famili Hypoxidaceae) Buah ia tau di empa, tau dikena ngubat pedis pala enggau ulser mulut.


Kala kita ninga entelah 'asi mansau periuk pecah'? Tu meh saut ia... buah kemunting tauka Melastoma malabathricum. Buah ia celum... tau di empa kitai mensia tang burung ke selalu agi makai. Asai ia kekadang tabar, kekadang manis tang mulut sigi celum udah makai buah tu. Daun ia tau dikena ngubat telih... Maia agi mit suba enti kaki telih bendar bala kami begiga ke daun kemunting tu... dikunyah lalu diengkah ba telih... Enda nemu nama kebuah... nitih ke jaku orang tuai aja...

Ba tisi kebun bisi pun jelai.... Nemu buah jelai kita? Buah jelayan ko sekeda tang aku bedau tetemu ka nama saintifik agi... Tau kita nulung aku lebih-lebih agi bala ke udah belajar taksonomi tumbuh-tumbuhan.

Sajak Merdeka

Lama udah aku nadai nulis ditu... Baru sari tu bulih idea... . Meri terima kasih ngagai Ngelai laban meri aku pemendar mansut ke sajak ti digaga ia tu(enti nuan maca tu, ila aku mansut ka sajak lumur satu nya)

Angkat Meh

Lepas ari nyawa singa

Tama nyawa naga

Lepas ari nyawa baya

Kitai... merdeka

Merdeka...merdeka...merdeka...!

Semina tinggal pengingat beduri

Tebak jerungkang mata sia

Sayat kemedu mata laja

Sayat emperingat dipangka ka bena

Telih lama

Diatu udah suman

Anak merdeka

Biar bekikis bulu betis

Biar bebuai bulu gundai

Kitai sama

Ngetan ka kota kemerdekaan

Anak Malaysia

Angkat meh, angkat meh sereta

Enggai ka pisang bebuah dua kali

Enggai ka telih bedarah baru

Teruska singkang

Teruska anak Malaysia

Merdeka!!!Merdeka!!!Merdeka!!!

Dibaca : Gara Sunday

Dikarang : Ngelai Udin

Mandi Sungai Serikai

Minggu nyin kemari udah Muai Basa niang aki.... kami semadi (petunggal ari sepiak daddy) mandi ba Sungai Serikai... Ke batang endar nang tiap ari kami mandi ai sungai laban bedau datai ai paip menua kami nya. Tang kali tu kami ke ulu ngulih ke dalam agi.


Tau wakil Malaysia tu... acara terjun....

Ciru ai kami wai... tau nemuai....

Bala madi, agi mandi telanjai...

Kami mandi ari pukul 9:30 pagi... pulai ke rumah pukul 1:30 lemai...nyau enda ampit asi. Kena anu (marah) bala sida ibu... sapa ke tuai nya meh ke paling teruk kena anu (aku meh nya).... Ni nda laun.... ngiga tekuyung minyak u..... Ujung minggu tu ka ngumpan.... mansai... ka enggau kami wai?

Lelengau ke aki..... ka pulai ujung minggu tu ngabas ini...

Enda dapat aku minggu tu.. ukai laban kelalu lama berendam (engka ga kini) tang laban 'jerebu'. Pala pedis... idung bisi insak... enggai makai... mandi pen lembau...Mata baluk... idung sendat... Kemari bisi telefon ngagai indai madah diri sakit... Patut orang madah aku anak manja neh... nama sakit telefon indai... udahnya sigi ka pulai ke rumah. Enti agi belajar udah lama aku ponteng kelas... Enda aku manja... orang laki enti sakit manja meh... ukai indu aja... isk isk isk... ka pulai.... pagila pulai aku... ari nam tu ari pengada aku ke-15.

Mulut pucat... mesti ngena gincu mirah...

Kenang Enggau Aki Dana

Minggu tu tadi kami sebilik dituntung penusah laban aki ti ngada ke apai aku nadai kena 25 ari bulan. Kami nadai nyangka ia jampat amat ninggal ke kami laban ta baru minggu nyin kemari kami bisi pulai ke rumah panjai... enggau bala betunu, bepansuh ka ikan pegung. Aku agi ingat niang enggai makai ngena pinggai kaca tang ka ngena pinggai tin ti dikena ia berari-ari. Gaga amat ia maia nya laban bala anak, menantu enggau uchu ia datai magang... udah makai betuggung ga bala ba ruai meda Konsert Akademi Fantasia. Beterauh meh bala lebuh maia meda konsert... ukai enda nemu ga pasal AF tu... ni ke nyukung, ni ke nganu...

Ko jaku, minggu tu ka betunu baru kami.... Amat meh bala datai magang tang timpang meh kami sebilik laban niang udah nadai agi enggau kami. Kekadang asai ke bisi nyawa ia bejaku ba dapur, ngasoh aku nganjung ai ke ruai... minta ambi ke gelas... Nya alai, agi ari ke terubah ia ninggal ka kami, aku sigi enggai tama ke dapur laban enti aku pulai ke rumah... kami duai niang sigi berandau ba dapur. Sinu amat ati aku ngenang. Bulan nyin kemari bisi aku meli sekelin ke bala petunggal lalu nyangkung seduai ia ini. Kumbai aku enggai seduai makai... peda aku nyingkau ga seduai laban enggai enda makai utai dibeli uchu.

Ia selalu amat nanya aku lebuh maia makai... "nama lauk nuan Umang?" lalu disaut aku "anuk". Maia aku agi mit suba sigi diau enggau seduai ia ini laban apai indai ti gawa ba menua ulu. Kenu ko cerita sida... maia agi mit, enti orang nanya aku baka nya... saut aku sigi belauk ke manuk belama taja pen makai ikan, jani, daun ubi. Enti nyabak rauh-rauh, ditanya orang ngetu meh aku dulu nyaut. Udah nya nyabak baru... amat tuyu ga pengawa maia agi mit. Nya alai, datai ke besai, udah gawa agi meh sida nundi aku.

Aki ngejang maia umur ia 75 taun. Ingat ndar aku maia makai selamat umur ia manggai 70 taun suba, bendar kami ngumbuk seduai ini besuap ke kek. Laban ke baru pindah ke rumah panjai, nadai TV seduai ini. Nya bala anak ia gerempung meli TV ke seduai. Maia kami ngasoh ia muka kotak... nya kami nundi ia... "ukai TV dalam nya aki, lampu picit aja kena di mandi malam" . "Lampu picit pama meh uchu" Enggai ke seduai kelalu boring meda TV1, TV2 enggau TV3 aja, maia aku meli moto suba, bisi diberi orang ASTRO pecuma, asuh aku pasang ba bilik seduai ia. Ngarap ke aki diau agi meh ba rumah, meda channel 50,51 enggau 52, enda 'segau-segau' ba kebun lada, madang getah.

Aki sigi bagas gawa... tumu pagi enggai enda enggau orang nurun nangkal. Taja bulih sekepin aja, enggai meh enda nurun. Lemai ke kebun lada. Ingat aku jaku ia ke bala anak uchu ia... "enti buruk dani pagi, takut ke panas, anang enda belajar bebendar kita ngambi ka bulih pengawa ti menyana, ulih dani laun, gawa ba bilik bisi ikun (aircond)". Nya sigi jaku peransang niang maia agi idup. Enti bala uchu ia buruk belajar sigi kena anu kami tu. Enti bulih pemutus peresa ti manah sigi "tu baru uchu aki", ko ia.

Aki enggai bepanggai ba bala anak uchu... taja pen bala anak udah kerja... ulih melanja seduai ini, aki agi ulih ngidup ke diri. Taja pen enda nemu ngena motosikal, aki meli motosikal kediri. Enda nemu ngena moto, aki meli moto tang enti ke pasar, nepan van tambang. Nya ngasoh kami sebilik geli ati enti ngenang aki ti bisi moto tang enda nemu ngena. Enti ditanya... "kapa meli moto deh aki?" "Kena aku raun," ko ia. Sigi amat ga... enti ia ka raun, ka nemuai ngagai bala uchu, nyamai amat ia... digiga ia aja sapa ti ka driba (drive) ke ia... Bala uchu sigi ka aja laban ka enggau ia raun.

Diatu aki udah nadai, sigi timpang asai kami sebilik. Nadai ga orang ka ditundi agi. Nadai orang ngambi ke kami ruas maia ka manduk pansuh. Nadai orang ngupak ke aku buah rian. Nadai orang minta aku maca ke ia surat agi lebuh pulai ke rumah. Enti ba menua diri empu, nadai ingat ke aki udah nadai tang lebuh maia pulai ke rumah panjai, dia baru berasai amat puang. Taja pia, kenang enggau aki sigi mengkang ba runding kami sebilik belama ia.

Enggau peluang tu aku ngari ke kami sebilik meri terima kasih ngagai semua bala ti udah meri bantu, bisi ngabas maia aki agi ba sepital lalu maia nyengai niang sari nya. Semina Tuhan ti ulih malas semua nya.


Raun enggau aki ba Pantai Alit (1986)


Mai aki raun ke Taman Gunung Kinabalu (2003)


Ari ke penudi enggau aki (28 Julai 2005)

Burung Dalam Sangkar

Keterubah aku ninga lagu Burung Dalam Sangkar ti dibai Roslina suba dikumbai aku lagu alam sekitar/hidupan liar. Bendar aku ngiga leka lagu ngambi ka ulih dikena kami belagu enti bisi Kem Alam Sekitar... ko jaku... Sekali meda...ndai... ukai pasal burung pia... Tang manah ga reti leka lagu tu deh...

Kasih ke burung dalam sangkar
Diau kediri tiap ari
Gamal dipeda sigat manah bendar
Nadai kala ninga bemunyi

Gamal ia runggu dipeda
Baka orang ti tusah ati
Diau dalam sangkar belama
Siku orang nadai peduli

Kasih aku meda burung nya
Dikurung dalam sangkar belama
Terbai enggai ga nyadi

Nama penyadi ia ila
Dikurung org kelalu lama
Tuai nadai bini sulu

Jaku Kelaung

Betemu baru kitai minggu tu... Nama rita wai? Udah matah ke lengan kita (udah makai)? Enti bedau anang guai main internet dulu meh... kasih ke perut nuan enggai ke nyau begeriuk legi...

Enti kita maca kumin (comment) ba Runding Aku... bisi kaban aku madah pasal bangsa subsidi (bangsa ti ngarap ke subsidi aja, buruk gawa - digaga kaban aku Chris)... geli ati aku maca, nda kala aku tepikir ke jaku bakanya... nyau baka munyi baja subsidi. Ka kita? Enggai aku dikumbai orang bakanya deh tang enti orang meri, ambi aja meh semina kitai anang ngemasau ke subsidi ke diberi orang ngagai kitai. Enda pia? Siti agi... anang nganti subsidi kitai wai... nda manah ulah bakanya, ngasoh buruk aja. Minta tau... tang anang kelalu ngarap. Orang meri, ambi... orang enda meri anang ngutuk. Au?????

Minggu nyin kemari... bisi aku tetama ngagai Randau Ruai... bisi siti topik ti munyi tu ANTI KA NYUKUNG ORANG IBAN ANANG MELI MAJALAH PEGARI. Ka ga aku maca laban ka nemu, nama kebuah uchak nya nyebut munyi nya... Tekenyit ga aku maca tang aku enggai mayuh jaku ditu. Enti kita ka nemu tau kita ngabas kia enda lama udah kita abis maca blog aku tu. Pelaba aku uchak nya ke batang endar ka amat maca majalah Pegari tang enggai meli... ka nginjau aja. Nyau lama-lama enggai bala bakih ia nginjau ke ia agi laban injau kara (udah nginjau enda mulai ngagai orang ke ngempu). Pedis ati meh tudah tuai tadi...

Cerita bukai... ari minggu tu tadi, pulai kami duai madi aku ari pasar, dia kami duai meda uchak dua iku benung bejalai ba tisi jalai. Ari jauh baka nembiak sekula ke benung begagai ba tisi jalai. Nyau semak agi, baka orang ke mai orang pedis kaki bejalai. Nyau semak endar... nemu nya uchak siku nya tadi sebening lalat (sebingau)... ukai sebingau agi nya peda aku... maia aku mansa nya... udah lakak-lakak ia ba tisi jalai. Pukul 12 ngalih ari nya wai. Udah berengkah DJ Ruby ba Rentak Ruai. Beguai aku nekan ke minyak Kancil aku. Enda alah ta dikangau ke kaban ia minta tulung. Enggai aku.... Ukai jai. Nadai guna nulung orang bakanya... Enti sakit tauka sidin (accident) sigi patut nulung. Tu, sakit digaga diri empu. Nyau malu aku meda laban mayuh amat orang mansa nya...

Sekali ga suba, maia aku mansa ba endur ti sama... (Jalan Hua Tai)... meda Indai Sanu ta bedandung nganjung bala ia nganti bas. Apu!!! Kumbai ia baka nganjung orang nepan perau kini... nyau malik magang orang peda aku. Enti ta burak nadai ga ngawa. Tu, lembau aku ka nyebut wai...

Ish... umbas nya bejaku ke orang... hehehe... Mupuk aku.

Runding aku...

Nama berita kita diatu? Lama amat aku udah enda nulis ditu. Ukai nama wai… nadai ari aku ka nulis. Enti ditulis sengapa enggai ke salah jaku aku legi…

Minggu nyin kemari aku nulis pasal main lumor.. enggai sida ke laki ninga pelaba aku. Bedau agi aku nulis pasal nyabung… kada enda digiga sida ia aku kini… Ka aku nulis pasal nya ila tang ukai nganu… semina ka mai kitai berunding tau ka ‘imagine’ munyi ko orang putih.. bakani gaya enti ta kami ke indu tu ta rauh-rauh ba nalan sabung… sida ke laki ngibun anak, berapi, bebasu, engkani jelu ba rumah. Kami ngansah taji… ujung minggu nyabung. Enti bisi pulis, pepar bala indu lari bedandung, bekain… Nadai agi kami ke indu tu berandau ka orang bukai enti bisi maia puang tang ati bejaku ke sida manuk burik, manuk labang… begiga ke indu manuk asuh jadi enggau manuk sabung kami ke manah ngambi ke bisi purih. Sida ke laki belajar bejait, kami ke indu belajar masang taji… pia ko jaku.

Tadi aku bisi mai apai tuai orang siku enggau aku. Ia nganti moto tambang ba simpang jalai… ka ngabas madi ia ti udah angus rumah ensana… Kasih ga aku meda…berumban amat ia peda aku enggai ke tinggal perau. Bai aja meh… taja aku enda ngelala ia. Sepanjai jalai nya mayuh ga utai dikerandau kami duai… Ia tu ukai orang sengapa pelaba aku… paling kurang pen tuai rumah meh ari gaya ia bejaku… Nadai nyebut utai sengapa… rindu ga aku berandau enggau ia…

Meda jalai ke ditengah kami duai ta agi bedebu, agi bebatu, nyebut ka tudah tuai… kasih ke kami ke selalu ngena jalai nya belama. Nya meh… ko aku... ngasoh moto jai jalai tu. Nadai ga kami duai mayuh jaku laban sama orang ari menoa bukai. Enda iboh meh bejaku ke pemansang menoa orang… manah agi berunding kati ka ngemansang ke menoa diri empu dulu. Udah nya berandau ka rega getah, rega lada, rega koko kami duai tadi. Manah runding ia dinga aku… nyau ka sebaka enggau runding aku (manah runding aku kini?). Bala kitai enti maia rega lada niki baru ka nanam lada… nama rega nurun lalu dibuai lada. Nyau ngining orang meh kitai tu tadi..pia ko ia. Amat ga munyi ko ia nya…

Berunding ga aku… sebedau ia nepan moto enggau aku tadi bisi aku mansa kebun sayur sida apek ba tisi jalai… Mimit tanah sida ia tang penuh laban sayur. Enggi bala kitai… tanah nyau penuh enggau sayur lalang tang nadai kala ga aku belauk ke lalang ngelama tu. Enti tanah bala kitai ke mayuh nya ditanam enggau sayur ke selalu diempa kitai… dalam sehari enti dijual enda patut kurang ari RM10. Sebulan udah RM300. Setahun..2 tahun… Enti anak baru ada, bala kitai udah betanam bejual ke sayur… maia anak nya ka tama ngagai besiti (universiti).. cukup meh kena tudah tuai mayar yuran… enda iboh kitai ka bejual ke tanah nya tadi. Nadai salah ka nyual tanah tang jual ngagai aku au…

Ni bala sida aya ibu ke nemu jaku Iban tu. Aku ta takut endar ke leka jaku dikena aku tu salah sepil… tang munyi ko aku ari suba… aku sigi enda nemu nulis enggau betul. Enti sema bisi salah… padah ke dia meh ngambi aku ulih belajar.

Main Lumor

Empai lama tu tadi bisi berapa iko bala bakih aku kena lumor. Gaga amat sida ia peda aku. Ni enda... gaji sebulan mimit agi ari nya.

Aku selalu mansa endur orang meli lumor ba Serikai ditu. Ke selalu agi dipansa aku Toto laban semak enggau SweHon Supermarket lalu ba tisi Toto, bisi siti kedai bup. Selalu meh kia, fotostat, meli pen, meli kertas, meli bup Pegari... maioh agi meh. Enti lelak bediri duduk ga aku ba bangku lalu nyeling-nyeling ngagai kedai Toto. Ukai nama... mayuh orang dikelala aku meli lumor dia... Enti aku duduk dia 10 minit, paling mimit, siku orang dikelala aku. Enda pecaya, tau ga enggau aku bejalai ba pasar Serikai.

Nama kebuah orang ka endar meli lumor neh? Maia aku agi belajar suba, bisi siko bakih aku ka endar meli lumor. Enti ke pasar, ka amat ia mai aku ngagai kedai lumor tang enda ga meli laban malu ke diri indu. Aku nganjong ia ka... meli sigi enda. Enda aku enggau orang bebeli ke lumor. Selalu bala-bala bakih ngumbuk aku meli lumor. Macam-macam meh utai disebut sida... ko jaku... enti orang nya enda kala meli lumor, sekali ia meli mesti kena. Pia ia kini?

Ka nemu nama kebuah aku enda enggau orang meli? Nya sigi siti ari prinsip aku... nama enggai, enggai meh nya... nadai jaku bukai. Ukai aku madah ke diri kelalu alim, anang salah sangka kita. Madah diri alim, legi dalam blog tu, enti maia ringat, pansut jaku jai nyau enda nyamai ga ati kitai legi.

Enti berunding lama-lama bisi ga kebuah bukai aku enda meli lumor. Legi enti aku udah sekali nguji meli, sigi ka nguji kedua, ketiga, keempat.... mayuh kali. Ujung-ujung abis duit aku kena bebeli ke lumor. Enda aku... manah agi kena aku nuci mua aku ba saloon, meli baju, meli enselup Avon, meli kasut tumit tinggi, meli Whiskas ke anak mayau aku 5 iko neh? Kapa enda orang bukai meli lumor... aku enggai ngasoh tauke kedai lumor nya kaya.

Anang enda nyamai ati kita ke kala meli lumor maca tu au? Aku semina mansut ke runding aku empu... ketegal aku enggai meli lumor. Pengidup kitai enda sebaka. Kita engka nadai mayau baka aku... Tadi RM 14.60 + RM 13.60 abis kena aku meli pemakai mayau aku 9 iko. Uduk 2 iko... enti aku pulai sigi nganti aku meli ke seduai ia pau...

Au, nya aja meh kenang aku ke sari tu... ngantuk amai mata tu asai aku.

Lagu-lagu Iban

Nemu kita lagu enda kempang duduk berimbai? Nya antara lagu Iban ti senang dikingat ka leka enggau tiun. Maia Gawai 2 taun nyin kemari, bisi ga ati ka enggau orang pekit belagu karoke ba rumah panjai... Baru ka nguji laban ke diri sebilik nadai ga malu amai tang lalu di asoh sida aya aku nyadi hakim. Enggai nyadi ga hakim enggau orang bepekit... sigi lumor satu aku legi. (Minta puji)

Suba jarang aku ninga lagu Iban... lebih-lebih agi maia aku di Kuching. Ukai enggai ninga tang orang ke selalu bejalai enggau aku enda rindu ninga lagu Iban... Ka ngumbai ukai Iban... ba IC ngena Sanu Anak Sanu ga... Belalai-belalai aku ninga lagu Iban enggau bala bakih... Manuk enggau Cangkuk, seduai tu sebilik... sigi selalu mai kaset Iban enti pulai ari menua.

Maia aku ke Sabah taun 2001 enggau Manuk, kami duai diau ba rumah John Rampai (Uncle John). Ia diatu gawa ba Jabatan Alam Sekitar Sabah cawangan Sandakan. Selalu amai kami dibai ia ninga lagu Iban evergreen enti nepan moto ia. Asai ke diau ba Sarawak semina ke enda ulih ninga Rentak Ruai aja.

Pulai ke menua endor gawa diatu, nyau landik agi ga aku belagu lagu-lagu Iban. Tang anang ngasoh aku belagu ba mua orang maioh. Enti ba bilik mandi, dapur... tau meh. Selalu sida sanu, sanu enggau sanu ninga aku rauh-rauh ari bilik mandi pelaba aku. Anang ringat wai....

Rindu ga ninga lagu Iban lebih-lebih agi enti lagu nya sigi tiun ti digaga diri empu tauka original ko jaku ribai. Enti nitih tiun lain semina nukar leka lagu aja, ka malu-malu ga aku ninga. Nyau asai ka madah ke diri ukai Iban ga aku ngagai bala bakih.

Nyau ka pukul 3. Ngetu dulu aku... ka main badminton aku lemai tu. Ila nyambung baru... ta ta.

Nadai Orang Ngabas

Lama ga blog aku udah digaga lalu nadai ga orang meri komen. Nama kabuah neh? Engka enda nemu jaku Iban pelaba aku... tauka orang ka nemu jaku Iban enda nemu kati ka ngabas blog aku.

Sari tu ngajar kelas pom 3. Siku nembiak semina mai pen siti aja. Bup sigi nadai... anu aku enda lama. Bakanya aja meh... ka muru ari kelas ngasoh ati makin tusah. Legi enti ia ta segau-segau ba kantin, aku ga enda nyamai ati.

Kemari aku enda ingat mandi malam. Apu!!! Amat balat indu dara siku tu neh... enda ingat mandi. Bisi orang bujang maca blog aku tu kini... malu aku wai. Bakatu cerita ia... udah ambis kelas kemari aku makai enggau Atuk ke pasar. Pulai ke rumah aku mandi. Abis mandi aku meda TV...tindok. Dani baru meda ari nyau lemai. Berapi aku tadi... makai...meda TV baru. Laban ke nadai peluh, daki pen nadai... enda aku ingat ka diri bedau mandi malam. Ka tindok baru aku ingat. Kapa aku nya... pagila mandi ko aku...

Naka tu aja cerita aku. Ila lusa nyambung baru.

Jelu Siga

Ehem... pedis aku ka mansut ka idea aku sekali tu laban aku suba belajar pasal jelu siga dalam jaku laut enggau jaku ribai aja. Baka ni tu legi neh? Pajak ka dia meh... enti salah, ngaga diri nemu ajak kita ke maca tu au.

Maia aku belajar ba Unimas suba aku sigi bisi belajar pasal jelu siga. Ditambah agi aku enggau orang ngaga Latihan Industri ba Sabah Wildlife Department, mayuh ga utai dipelajar ka aku. Siti bansa jelu siga ti dikerindu ka aku ianya mayas tauka orang utan. Maia pensyarah aku madah aku dianjong orang ke Sepilok Rehabilitation Centre... nda tinduk aku semalam-malam nya laban cukup gaga.

Baru-baru tu bisi aku maca ba suratkabar, mayas ba Matang Wildlife bisi nyerang dua iko indu maia sida benung bejalai-jalai meda jelu-jelu ba endur nya. Bisi ga ati aku irau... irau ka indu dua iko nya serta irau ka nasib mayas ti nyerang seduai ia.

Maias tu enti ia udah besai sigi ulih nyerang mensia tang selalu ia, sida nyerang enti kitai ngacau sida dulu. Ngambi ka cunto (betul leka jaku aku tu?)... kitai ngemba sida, kitai ngerising ke mua ngagai sida, kitai ngacau anak sida, kitai ngacau pendiau sida enggau mayuh agi meh.

Maia aku nyaga anak maias ba Sepilok suba, nadai kitai ulih nyangka sida ulih nyerang kitai laban sida cukup bepanggai enggau kitai. Asai ke nyaga anak mensia aku suba. Enti ke agi mit endar sigi nusu ngena butul tusu anak mit sida ia. Perangai pen baka perangai anak mit... rindu amat aku meda, megai lalu ngajar sida bejelangkit. Udah besai gamal sigi jai... ka megai pen takut. Kala aku enggau lutor jelu ngaga post moterm siku maias tuai ti mati laban sakit... enggai aku meda mua ia sepanjai-panjai post moterm nya.

Em..ka tinduk aku. Ila aku nyambung baru au...

Aku

Tu sigi ia keterubah aku nulis ngena jaku Iban ba blog. Takut amai aku enti bisi salah laban sigi enda kala belajar jaku Iban enggau manah maia agi sekula. Maia aku Darjah 4-6, pengajar ti patut ngajar aku jaku Iban selalu amai enda nurun ke kelas. Maia ba Pom 1 - Pom 5, laban aku besekula ba SMSains Miri, nadai aku belajar jaku Iban din tang kami belajar Mandarin.

Enti sema bisi orang Iban maca tu, enti bisi salah tulis, minta tulung kita madah ke aku ngambi aku nemu dini silap aku.

Naka tu aja sari tu... ka tinduk asai mata aku tu.