Nama berita kita diatu? Lama amat aku udah enda nulis ditu. Ukai nama wai… nadai ari aku ka nulis. Enti ditulis sengapa enggai ke salah jaku aku legi…
Minggu nyin kemari aku nulis pasal main lumor.. enggai sida ke laki ninga pelaba aku. Bedau agi aku nulis pasal nyabung… kada enda digiga sida ia aku kini… Ka aku nulis pasal nya ila tang ukai nganu… semina ka mai kitai berunding tau ka ‘imagine’ munyi ko orang putih.. bakani gaya enti ta kami ke indu tu ta rauh-rauh ba nalan sabung… sida ke laki ngibun anak, berapi, bebasu, engkani jelu ba rumah. Kami ngansah taji… ujung minggu nyabung. Enti bisi pulis, pepar bala indu lari bedandung, bekain… Nadai agi kami ke indu tu berandau ka orang bukai enti bisi maia puang tang ati bejaku ke sida manuk burik, manuk labang… begiga ke indu manuk asuh jadi enggau manuk sabung kami ke manah ngambi ke bisi purih. Sida ke laki belajar bejait, kami ke indu belajar masang taji… pia ko jaku.
Tadi aku bisi mai apai tuai orang siku enggau aku. Ia nganti moto tambang ba simpang jalai… ka ngabas madi ia ti udah angus rumah ensana… Kasih ga aku meda…berumban amat ia peda aku enggai ke tinggal perau. Bai aja meh… taja aku enda ngelala ia. Sepanjai jalai nya mayuh ga utai dikerandau kami duai… Ia tu ukai orang sengapa pelaba aku… paling kurang pen tuai rumah meh ari gaya ia bejaku… Nadai nyebut utai sengapa… rindu ga aku berandau enggau ia…
Meda jalai ke ditengah kami duai ta agi bedebu, agi bebatu, nyebut ka tudah tuai… kasih ke kami ke selalu ngena jalai nya belama. Nya meh… ko aku... ngasoh moto jai jalai tu. Nadai ga kami duai mayuh jaku laban sama orang ari menoa bukai. Enda iboh meh bejaku ke pemansang menoa orang… manah agi berunding kati ka ngemansang ke menoa diri empu dulu. Udah nya berandau ka rega getah, rega lada, rega koko kami duai tadi. Manah runding ia dinga aku… nyau ka sebaka enggau runding aku (manah runding aku kini?). Bala kitai enti maia rega lada niki baru ka nanam lada… nama rega nurun lalu dibuai lada. Nyau ngining orang meh kitai tu tadi..pia ko ia. Amat ga munyi ko ia nya…
Berunding ga aku… sebedau ia nepan moto enggau aku tadi bisi aku mansa kebun sayur sida apek ba tisi jalai… Mimit tanah sida ia tang penuh laban sayur. Enggi bala kitai… tanah nyau penuh enggau sayur lalang tang nadai kala ga aku belauk ke lalang ngelama tu. Enti tanah bala kitai ke mayuh nya ditanam enggau sayur ke selalu diempa kitai… dalam sehari enti dijual enda patut kurang ari RM10. Sebulan udah RM300. Setahun..2 tahun… Enti anak baru ada, bala kitai udah betanam bejual ke sayur… maia anak nya ka tama ngagai besiti (universiti).. cukup meh kena tudah tuai mayar yuran… enda iboh kitai ka bejual ke tanah nya tadi. Nadai salah ka nyual tanah tang jual ngagai aku au…
Ni bala sida aya ibu ke nemu jaku Iban tu. Aku ta takut endar ke leka jaku dikena aku tu salah sepil… tang munyi ko aku ari suba… aku sigi enda nemu nulis enggau betul. Enti sema bisi salah… padah ke dia meh ngambi aku ulih belajar.
4 comments:
sekeda ari utai diulih ari perati(observation) aku...
mayoh apai indai bangsa kitai nadai nyimpan duit dikena anak belajar. nyau pagila ka register ba universiti baru kesit-kesit begiga ka duit, beinjau lalu bejual ka tanah. uji tak besimpan ka barang RM50 sebulan ari anak kitai mit tauka melabur ba saham, bisi meh ulih maya anak udah cukup umur masuk universiti.
are we turning into 'bangsa subsidi'???
Amat... amat... setuju ndar aku... Malu ga enti kitai dikumbai orang bangsa subsidi... nyau baka baja subsidi aja munyi ia...
enda ga kitai ulih nyalah ka apai indai aja.bakani deh enti amai nadai duit..ka pan nyimpan..enti ka dempa pan enda cukup.ukai aku nyangkong tang tu meh ti amat.mayuh bansa kitai ti agi merinsa kesit2 begiga ka duit.ukai nadai runding ka nyimpan tang munyi ka aku duit enda kala cukup.
Terima kasih ke runding nuan. Amat nya. Ukai senang ga begiga ke duit enti amat nadai. Kitai tau nginjau ari bala kaban belayan, tang enti sema kitai nginjau duit ari orang, kemaia kitai ka mayar? Bisi orang semina nemu nginjau tang jarang ka mayar. Enda kitai mayar sekali... enti bisi rm, pupuk dulu meh.
Post a Comment