Pejalai Pengajar

Enda lama agi sekula baru ga bala nembiak. Bala pengajar bisi ti udah pulai ke sekula laban bisi minggu orientasi ngagai nembiak pom satu enggau darjah satu. Bisi ga nurun miting. Aku empu lalu bedau ngabas sekula laban nadai pengawa aku taun baru tu enda baka taun dudi nyin suba. Nadai diberi orang nyadi guru tingkatan laban jadual aku mayuh serta selalu nadai ba sekula.

Asai ke pandak amat kemisi sekali tu. Berengkah ja pemisi sari nya aku bejalai ngagai Sabah dua minggu. Udah nya pulai ke rumah lalu sakit. Bedau tentu gerai amat aku terebai baru ngulu ke petunggal aku ngabas anak ia ba KL. Datai din sakit baru ga enda tan celap ba Cameron Highland. Berapa kali mutah nepan moto. Aku nadai tentu enggau orang bejalai semina diau ba rumah aja... tinduk ngetat ke diri.

Benung aku shopping ba Tesco telefon indai aku madah ka bisi orang ba Kuching ngiga. Nadai mood agi aku raun ba KL. Pulai ari KL (ngagai Sibu) aku lalu nurun ke Kuching mai moto kediri enggau kaban aku siku. Enda tinduk semalam-malam laban ke irau ati. Udah abis pengawa ba Kuching aku lalu ngagai Batu Lintang Sri Aman ngagai petunggal aku nikah. Apu.... asai ka ngetu aja aku driba laban kelalu ngantuk tang takut ke enda sempat datai. Nyau malam baru aku datai ba Purai, Batu Lintang. Dua kali ngetu nanya orang ba jalai enggai ke lanjur.


Gambar sebedau ngagai gereja... (aku agi ba Kuching maia tu)


Kelalu mayuh orang... baka selebriti ga petunggal aku tu nikah

Semalam-malam nya meh orang rami. Bajik amat ga pentunggal aku malam nya ngena ngepan orang ulu ia. Tang aku nadai begambar laban kelalu lelak. Enti nitih ke ati enggai aku datai tang laban ngenang ke kaban. Bedau agi nyau pengelelak tumu pagi aku digerak indai mai pulai. Aku ngasoh sida pulai dulu laban aku agi ka tinduk tang sida ia enggai meda aku mai moto kediri. Nurun aku kebaruh peda aku ini aku ditinggal ke sida ia enggau aku pulai. Ka pen enggai pulai meh aku jampat-jampat laban ke mai orang tuai. Ko jaku ka ngetu ba Betong ngabas kaban aku siku tang udah mai orang tuai tambah agi mata buntau aku pulai terus ke Sarikei.

Datai di rumah aku nadai mandi kira ke nyau 24 jam.... aku tinduk terus. Kapa aku mandi. Lelak amat. Lemai baru aku mandi (udah lebih 26 jam enda mandi).

Sari tu baru bisi enseput mimit. Sida menyadi aku ke rumah panjai laban orang bisi nyayat ngut pagi tu. Aku enda enggau... legi ngining orang aja makai ngut tunu. Agi batuk tu mayuh amat penti.

Naka tu dulu neh....

Pengajar Sakit

Ukai nama nadai nulis blog seminggu tu udah. Pengajar sakit. baru sari tu bisi enseput mimit. Nganti udah pulai raun ila aku nulis baru.

Ujian Akhir Tahun

Tu peresa digaga Pengajar ke bala kita.... Enti kita betul magang ila Pengajar melanja mee rangkai...



Create your own Friend Test here

Tamu Ba Sabah

Wesly mai aku ngagai tamu dua ari beturut-turut. Ari terubah kami ngagai Tamu Tamparuli. Tamu tu bisi tiap-tiap ari tiga. Aku kala ngagai Tamparuli suba enggau Empidan nganjung orang.. hehehe... (anang nyabak Empidan). Puas aku ngiga dini alai Jambatan Tamparuli ti popular amat dalam lagu Jambatan Tamparuli.


Tetemu ke signboard ia.


Jambatan Gantung Tamparuli. Tang ko orang, ukai tu jambatan ti disebut ba leka lagu nya.... Jambatan lama baruh ia... Nadai gambar.

Ari empat Wes mai aku ngagai Tamu Dongongon... suba aku kitu tiap-tiap ari tang nadai kala ngagai Tamu Dongongon laban kerja maia nya. Pulai kerja dah pukul lima berumban ga kami ngambi bas mini ke Luyang berapi ke Empidan.


Enti ba menua aku empu, beli aku magang tekura tu deh... Bendar kami duai Wes milih tang siku pen nadai dibeli..hehehe...


Sama baka enggi kitai peda aku semina munyi tebah sida lain agi.


Raga enggau baka sama.... enda aku meli


Kati kitai nyebut utai tu ba Iban wai? Pansa kenya aja... Ka meli ko jaku tang ninga Wes enggai makai enda ga.

Agi ka aku bejalai ba Tamu.. nama kebuah Empidan enda kala mai kami bejalai ngagai Tamu suba neh?

Agi idup agi bejalai

Bala Majak Mayuh

Enda aku tekenyit meda mayuh amat blog ngena jaku Iban diatu. Suba aku semina muka enggi sida Puteri, Cath, Uchu Keling, Groovytuai, Sebanati... tang diatu, buka enggi siku peda bisi ga link ngagai orang bukai. Nyau seari-ari aku maca blog bala kita ke ba menua serta menua tasik. Diatu kemisi sekula... nadai mayuh pengawa ka digaga.

Aku meri terima kasih ngagai semua kita ti bisi ngaga link ngagai blog Pengajar. Nyadi aku nyau sebening ka ngaga link ngagai blog kita. Enti sema kita ka aku ngaga link... kita meri komen ba post aku tu.

Agi idup agi ngaga blog

Aku nganti Empidan ngaga blog.

Buah nyur tunu

Pulai ari Kundasang kami sekaban ngetu makai buah nyur tunu ba ... enda ingat dini. Semak Putera Jaya dia meh....

Anang enda nguji makai.... Nadai ga nyamai amat nyur tunu tang puding kepala ia sigi nyamai. Tambah agi rega lukan nya mudah banding enggau ba Skei.

Indu nya

Terubah suba kami duai tu manah begulai ngau pangan diri laban sama-sama baru. Lama ke lama ia majak berubah serta mulut ia kelalu bangat jai bejaku serta nganu orang. Mayuh orang enggai meda ulah ia bakanya ta enda nemu bebasa ke orang tuai kadang-kadang. Selalu meda penyalah orang tang enda sedar ke penyalah diri. Kala sekali ia ditemu orang ngaga penyalah... nyau abis menua endur ia becerita madah ke bisi orang ngerepot penyalah ia. Nda ibuh diripot penyalah ia nya. Sigi senang ditemu.

Sekali ia kala nganu aku... maia nya aku sakit. Pedis amat ati aku tang aku agi sabar. Kali kedua laki ia nyindir-nyindir aku tang aku diau aja. Munyi ko kaban ia empu, seduai laki bini enti enda nganu orang sigi enda ulih idup. Ukai aku munyi nya, kaban ia empu. Kumbai ia ka kaban ia meda ulah seduai laki bini ko ia.

Baru-baru tu ia majak enggai meda aku. Nadai kala aku ngasai ke diri kelalu sumbung tauka lawa. Ari suba aku sigi selalu bejaku ribai enti begulai enggau bansa bukai tauka bansa Iban mega. Ukai lawa tang aku agi belajar jaku ribai. Sampai sari tu aku bedau landik bejaku laban aku majak jarang bejaku ribai. Tang mayuh orang enggai meda kami Iban tu bejaku ribai... ati ditunda sida aja-aja meh enti kami bejaku.

Sari nya ia nganu aku ba mua kaban aku serta ba mua kaban apai aku. Sida ia nusui ngagai aku. Udah nya aku enda bejaku enggau ia agi nyentuk ka sari tu. Ia enggai meda aku serta ka amat bejai aku ba mua orang. Bisi ari ila ia bulih penulah laban ati ia ti bangat jai nya. Taja ia bejaku baka orang ti kering tang enti ia bulih penusah ia seruan nyabak ba mua orang. Bisi ari ila ia nyerauh nyabak baka ia ke bejai orang. Ni pengelama ia bejai ke orang, nya meh pengelama ia nyabak. Pengidup kitai baka tayar moto.

Lok Kawi Wildlife

Suba maia aku latihan industri aku dianjung pensyarah ngagai Jabatan Hidupan Liar Sabah. Aku enggau tiga iku agi kaban diasuh orang ngagai Taman Zoologi dan Botani Lok Kawi enggau ngagai Sepilok nyaga Orang Utan. Maia aku din suba aku diau ba rumah Empidan ba Luyang... Manah amat meh Empidan tu enggau bala nembiak ti diau ba rumah ia nya.

Taun 2001 nadai mayuh jelu ba Lok Kawi. Semina bisi burung, gajah ti benama Rocco enggau sida jelu ke kena kuarantin. Diatu endur nya udah dibuka ke orang mayuh tiap ari.


Rocco... maia aku praktikal suba kala aku nepan gajah tu.


Tu gambar rimau benung bira


Lok Kawi Wildlife Park... Orang besai enda tuai RM 10, nembiak mit RM 5, orang tuai tauka warga emas free enti ka tama kitu.

Bejalai Ngagai Grace Garden

Lemai kemari udah abis semayang ba Gerega Methodist Shern En aku dibai kaban aku maia ba Unimas suba makai ba Grace Garden. Empat iku kami.Dua iku nya sigi coursemate aku. Siku agi pangan seduai ia. Lemai tu legi aku dibai Cikgu Epius makai di rumah ia ba Penampang. Nya ga rindu endar enti mayuh kaban.


Kaban aku maia agi belajar ba universiti suba..gambar enda tau terang iga laban tu gambar orang.... Jay, Cikgu Epius enggau Pengajar

Kening menyadi angkat aku Wesly (4 taun) udah digam lemai kemari telih maia semayang. Sinu ati meda kening ia tang ia sigi nadai nyabak berengkah ari ia labuh sampai pagi tu. Maia orang nuci telih pen ia diau aja. Maia nganjung ia ke spital, tinduk ia dalam moto. Sigi pama Spiderman kami nya. Pagi-pagi dani udah mai aku main puzzle.

Cerita Ari Kundasang

Aku baru pulai ari Kundasang lemai kemari. Aku agi alit ati bakani duit ke dipansut ke aku ensanus bedau dikena... agi dibai aku pulai baru ke KK.

Aku enda ga gagit amat ka ke Kundasang laban selalu amat kin tang kaban aku ari Mudong siku tu enda kala kin... Ngulu ke ia aja. Semina ngagai Kundansang War Memorial nya aku bendar amat begambar laban baru keterubah ia. Ila engkah gambar ditu. Aku nadai mai tali kabel kamera aku. PC aya aku tu nadai card reader.... Em... bisi PC fair ba KK sari tu... legi meh aku meda enti aku sempat kia. Agi nganti kaban aku J ngambi aku kitu da Putera Jaya.

Alit ati aku meda sida bumiputera ditu mayuh amat bisi kedai kediri empu. Semina ba bandaraya KK bala sida tauke enggau taukenio mayuh muka kedai tang enti aku ngagai endur bukai baka Kundasang, KB, Ranau... sida tauke nya ta bejaku Dusun tauka Bajau.

Uji kitai bejalai ba serata menua Sarawak... Berengakah ari Kuching, Serian, SriAman, Betong, Sarikei, Sibu, Bintulu, Miri, Limbang, Lawas.... tusah amat ka ngiga bala kitai bisi bekedai. Amat meh tauke nya nemu bejaku Iban lebih agi enti ba Sri Aman... tang anang saru mata sida ia sipit wai...Aku empu pen enda muka kedai... Ila enti aku dah muka kedai anang kita enda datai meli ba kedai aku.. Anang enda nyukung aku...

Sari nya aku ke Bintulu... terubah meli belacan ba kedai siti. Udah nya aku bejalai baru meda bala kitai nyual belacan.. Aku meli... nyukung bala diri ko jaku. Pulai aku muka belacan... mit amat meh belacan bala kitai tu. Nyau ringat kediri aku digaga ke bansa diri bakanya.

Bah... naka tu dulu. Ila becerita baru..

Nitih ke semaya... tu gambar sekeda ke diambi aku sari nya...


Gambar tu diambi ari Jalan KB Ranau... Enti nengah jalai tu manah agi rampa menua ulih dipeda serta ulih meda rumah Felix AF ba Kpg Purak Ogis...


Nguji nebah engkerumong orang Dusun...


Ngetu enda lama ba Kundasang meli keropok bayam, strawberry panggang enggau buah pisang.


Tu meh strawberry orang Kundasang... ukai ke dipanggang tu...


Gunung Kinabalu diambi ari Kinabalu Pine Resort.


Kami duai Empidan kala bejalai di atas din... kita deh?

Olahraga Pembangunan

Baru abis olahraga pembangunan kami kena 24-25 ari bulan tu tadi. Sekula kami bulih 10 emas... nambah ke 6 iti ari taun nyin kemari. Siku nembiak ulih mecah ke rekod belumba jalai kaki MSS Sarawak. Siku agi nembiak ulih mecah ke rekod 800m enggau 1500m MSS Sarikei. Dua tiga taun ti udah acara jarak jauh sigi mayuh pulai ngagai kami perais... Siku nembiak udah dua taun nyadi johan kebangsaan acara merentas desa (belanda ba babas)... Sigi pama nembiak ari pakan... teleba bejalai nujah bukit...

Nama agi rasia sida tu? Disiplin ti manah. Nadai kala ngular maia belatih. Bebasa ke cikgu ti melatih sida. Enda baka bala sekeda... Baru megai rekod sekula tauka bulih pingat emas sekali dua lalu enggai ninga ke jaku jurulatih... ngasai ke diri udah STAR... Enggai nurun belatih. Nadai ati ka maju.

Sambutan Perayaan Hari Kemerdekaan Ke-50

Taun tu rumah panjai kami, ianya Rh Gundak Sg Paoh dipilih ngari ke sitak Sarikei enggau orang bepekit Sambutan Perayaan Hari Kemerdekaan Ke-50 ti digaga Jabatan Kemajuan Masyarakat (KEMAS). Berengkah ari pun bulan lapan tu kemari kami serumah bergutung-ruyung ngaga nama utai ti patut. Bala sida ke indu begaga ka langsir, beriyas ka rumah lalu sida ke lelaki tadi begaga ka pintu gerbang. Bendera Malaysia digantung ba tiap pintu bilik. Bala nembiak pen bisi nulung bala apai indai ngambi ka rumah panjai kami manah dipeda serta bisi mandang ka imej Hari Merdeka

Info pasal Rumah Gundak

Tuai Rumah : En. Gundak Ahlin
Sapit Tuai Rumah : En Wilson Awit
Pemanjai : 32 pintu
Penyauh ari pasar Sarikei : 16 km
Logo




Pun penatai ngagai Rumah Gundak... Kitai ulih ngasai ke semangat merdeka maya kitai meda pintu gerbang tu.


Belon ti dipasang ba ruai kena ngiyas rumah... 5o Tahun Merdeka Malaysiaku Gemilang.


Banner ti digantung ba ruai Tuai Rumah


Ruai kitai... Datai meh ngagai Rumah Gundak kena 10hb September tu. Mayuh agi pengawa ti ka diatur berengkah ari pukul 3 lemai nyentuk ngagai malam ari.

Kena 26 haribulan 8 tu kemari kami serumah bisi ngereja aktiviti Hari Kemerdekaan. Mayuh aktiviti ti digaga baka konvoi Hari Merdeka, pertandingan mewarna, sukaneka, pekit karaoke, ceramah merdeka enggau mayuh agi ke bukai.

Ba sukaneka, acara ti bisi digaga ianya pekit nyumpit, ngaga ketupat,ngisi ai dalam botol, ngiga coklet dalam tepung, mai belon ba pah, belanda 150 meter, mai bola pingpong ngena siduk enggau bowling buah nyur. Tiap pintu nganjung siku wakil enggau sukaneka tu.


Bowling- Indai Chu (bini tuai rumah) benung nikau ke buah nyur


Sukaneka nembiak - ngisi ai dalam botol


Nembiak mit benung ngiga coklet dalam tepung


Flosy Atu mendeklamasikan sajak merdeka


Gloriana Nina mantai ke pengelandik ia ngajat


Kami serumah begempuru udah lelak ngereja pengawa ba siang ari. Meri terima kasih ngagai semua kami serumah laban cukup meri kerjasama lebuh begaga ka pengawa baik nya bala ke tuai, bala nembiak tauka anak mit.

Tu meh reti merdeka ngagai kitai serumah. Ukai semina Malaysia merdeka tang kitai serumah pen merdeka dalam ati runding enggau pendiau kitai. Selamat Hari Merdeka. Awak ka semangat merdeka tu terus mengkang dalam ati kitai serumah belama-lama ia.



Angkat semua anak merdeka
Terus ka siti ari
Terus ka siti tuju
Singkang ke kaki nuan
Terus...lurus...

Pagila, lusa, ila...
Teruska hari kemerdekaan
Padah ke diri serumah
Bekangau ke diri selangkau
Bekumbai ke diri seberai
Besada ke diri semenua
Menua tu....
Hari tu...
Dunya tu...
Ungkup kitai
Kitai semua...anak merdeka
Merdeka...merdeka...merdeka...!!!

Ngambi Tupi

Aku enda nemu nama kebuah bala kitai selalu madah Convocation tu ngambi tupi.... Enti bala kita bisi nemu tau madah.

Baru ja ngambi tupi aku ti kedua 21 Ogos sari nya.


life is not a holiday but an education - pengidup ukai kemisi tang kena kitai belajar (pelaba aku aja nya.... bad translation) Nulung aku uncle empidan... Ngulih ke Iban nuan A+. Ila aku engkah gambar tua raun ba Genting ditu.. hehehehe...

Tugu Pengingat Rentap

Sapa ti enda ngelala Rentap... Ari mit aku sigi nemu Rentap tu sigi popular tang aku enda kala nemu pendam Rentap tu ba sitak menua Pakan. Kumbai aku ba Sri Aman. Enda ka tentu nyalah ke diri empu laban nadai kala orang madah ke aku lalu nadai kala tebaca ke pasal nya.

Kemisi tu tadi aku enggau orang Larian Bersejarah Pahlawan Rentap ti diatur Jabatan Penerangan enggau Kelab Setia SMK Pakan lalu dipejadi ka YB Dato' Joseph Salang.

Ari ke terubah kami diau ba Rh Unjar, Sg Buluh Rebuh. Ari pasar Pakan kami ngena twin cab tama ngagai Jalai Wak. Kira 20 minit kami tama ngagai simpang mit. Sejam udah nya baru kami datai ba Rh. Unjar.


Bala kami sebuat ditiki enggau cukup basa ari sida Rh Unjar serumah.


Merarau belauk ke utai babas dipanduk ba buluh.


Tumu pagi kami mupuk ngagai Sg Empit kira-kira sejam ngejang ari Rh Unjar.


Tu meh endur Aki kitai Rentap bersemadi.... Cukup sinu meda endur tu enda tentu dijaga enggau manah.....


YB Dato' Joseph Salang miring meri basa ngagai pahlawan Rentap

(nyadi entubung Rentap tu dibuka... tang aku nadai gambar ia laban aku lari lebuh orang ka nyayat babi. Enti kaban aku ka meri, ila aku engkah gambar tulang nya ditu)


Rumah Ujang, Sungai Empit rumah panjai ti pemadu semak enggau lumbung Rentap.


Tu meh sekeda ari bala ucu icit Rentap ba Rh Ujang, Sg Empit Wak Pakan Sarikei Sarawak.

Pengidup Sida Ia

Kes 1

Siku nembiak enda nurun sekula dua minggu ketegal enda tembu ngaga kerja kursus Sejarah PMR. Maia kami duai berandau ia madah ia udah enggau orang gawa nunyau semin. Gaji RM25 sari. Diatu nembiak nya udah nurun sekula baru. Sigi pedis ka ngemansang ke nembiak ti nadai ati ka belajar. Tusah ati lalu sinu ke sida ia... Kasih meda apai indai ti bendar amat ngiga belanja kena nyekula ke sida.

Kes 2

Kaban aku tebaca ke surat nembiak nuju apai indai ia... Minta kirum ka duit RM10 laban tudah tuai nyau nadai duit ke belanja agi. Sinu ati lebuh aku ninga laban nembiak tu sigi mereti serta rajin taja enda entu pintar amat. Kini ke tuju nembiak tu ila enti ia udah abis pom 5? Ia manah tang kurang ari segi pemandai ia. Aku arap ia ulih ngatur idup ia empu ila.

Kes 3

Apai enggau indai ia udah sarak... Apai bebini baru, indai belaki baru... Ia diau enggau aki ini ia...

Kes 4

Anak sida ia ngaga penyalah ba sekula. Apai indai nembiak ngari ke anak...

Kes 5

Baka ni ka ngasoh anak enda nginsap, enda ngirup enti sida pulai ke rumah meda pengawa orang ba rumah bakanya. Arak rega RM2 sebutul tau dibeli sida ke nembiak bakanya aja... Sigi gaya enti ngiga untung.


DINI PENYINU BALA KITAI KE DIRI EMPU? ENDA IBUH SINU KE ORANG BUKAI... CUKUP MEH SINU KE DIRI EMPU....

Iban... Iban...

Aku pen enda nemu nama kebuah berapa hari tu aku selalu ka ringat-ringat maca utai ditulis ba messagebox aku... Enti ba message box Pejalai mayuh agi... nyau chatting bala dia... beberi ke no telefon. Keterubah aku enda ga peduli amat ke bala ti ka endar chat ba message box aku..ni nemu betemu jodoh bala sida ia... Tang enti orang nya misunderstanding... Nganu-nganu orang lalu enggai alah pemandai... malu ga aku maca. Ukai aku enda ulih delete tang ngambi ke orang bukai meda nama pengawa bala kitai Iban enti udah nemu ngena komputer enggau internet.

Kasih ga menyadi aku dikumbai orang tesat enti bejalai jauh ari menua laban tudah tuai enda nemu jaku ribai... Jakun... Sapa meh pengajar ia suba neh?

Jakun bala pengajar ko bala nembiak. Engka nya alai nembiak diatu majak jakun sejakun laban pengajar sida ia jakun. Engka bala pengajar mesti graduate ari menua orang putih baru sida ia enda jakun. Engka enti enggai dikumbai jakun kitai mesti nyadi PR ba menua orang putih. Baka ni neh... enti bisi orang putih ka ngajar nembiak ditu, ka ga aku minta PR ba menua bukai.

Pengajar bulih elaun

Baru tu tadi bisi TV3 masut ke dokumentari bala pengajar ti ngajar ba pendalaman Sarawak, Sabah enggau Semenanjung. Udah nya bisi berita madah ke bala pengajar ti ngajar ba menua ulu bulih elaun Rm500 ngagai RM1500. Mayuh bala pengajar gaga ninga nya lalu bisi ga bala sekeda ke ngajar ba menua ti alang-alang enda puas ati. Nama runding aku?

Aku setuju bala pengajar ti ngajar ba menua ulu ti nadai karan, nadai ai, nadai datai jalai diberi elaun. Aku agi ingat maia agi mit suba apai enggau indai aku ngajar ba Ulu Entaih, Julau. Tumu pagi kami mupuk ari rumah ke Ng Engkamop ngena moto. Udah nya kami ngena perau ke Bebelit. Datai di Bebelit kami bejalai kaki ke Ulu Entaih. Pukul 7 lemai baru datai di kuarters. Nya enti ai enda langkang. Aku kala enggau sida ia bemalam ba rantau jalai maia ai langkang serta kala ga kami bejalai 8 jam ari Ng. Engkamop laban perau nadai. Ujung taun 1987 perau ke dikena kami pulai karam ba wong. Aku agi ingat aku enggau madi aku Fred diau aja meda luan perau tama ai. Apai aku narit kami duai ke belakang. Udah nya aku meda basikal tiga tayar aku tenggelam enggau tin ruti perais aku bulih lumur satu tenggelam. Kami niki ngagai batu di bai ke tisi sungai. Kami nadai bebadi tang barang mayuh lenyau.

Ukai nyamai ngajar ba menua ulu. Sigi patut bala pengajar di beri elaun bakanya. Munyi ko bakih aku siku, sekali nurun, seput baka ba ujung senapang.

Tang, aku bisi ga pengirau ati... Ukai aku kepapas tang ngenang ke bisi bala pengajar ti enda tentu ransing ati ngajar bala nembiak. Menua ulu sigi pedis dilawa bala sida nazir tauka bala pegawai ari Pejabat Pelajaran Gabungan. Aku selalu ninga rita bala pengajar nadai tentu tama kelas... (rita aja... aku enggai nusui kelalu mayuh enggai ke salah).

Aku diatu ngajar ba sekolah menengah. Nembiak kami ba siti form bisi dalam seratus lebih. Kami bisi lapan ngagai sembilan kelas. Kelas ke pengujung endar nya kelas ti enda nemu maca. Enam taun sida ba sekolah rendah enda nemu maca... Baka ni kami pengajar ti ngajar Sains, Sejarah, KH ka ngajar subjek kami enti nembiak tu enda nemu maca? Sida pengajar Bahasa Melayu sigi ngajar suku kata baru tiap-tiap ari. Kami pen ngajar sida ia maca suku kata. Masuk taun ke 2 (Form 2) sida ke rajin nyau nemu maca. Nama runding kita? Mupuk aku.